Honor компанияси Хитойда 5G’га эга ўзининг энг ингичка смартфонини сотувга чиқарди

Honor компанияси ўтган ҳафта оммага тақдим этган ўзининг янги смартфони — Honor Play6T Pro’ни сотувга чиқарди, деб хабар беради IXBT.

Мазкур смартфон дастлаб Хитойда сотувга чиқади. Харидорлар қурилманинг 8/256 гигабайтли версиясини 251 долларга сотиб олиши мумкин.

Таъкидланишича, мазкур аппарат Honor’нинг 5G алоқа тармоғини қўллаб-қувватлайдиган энг ингичка смартфони ҳисобланади — унинг қалинлиги 7,45 миллиметрни ташкил этади. Вазни ҳам у қадар оғир эмас — 175 грамм.

Honor Play6T Pro смартфони Full HD+ (2388 х 1080 пикселли) сифатни қўллаб-қувватловчи ва 90 герцли тасвир янгиланиш частотасига эга 6,7 дюймли IPS экран билан жиҳозланган. Олд қисмдаги қирқимга ўрнатилган фронтал камера 8 мегапикселни ташкил этади. Асосий камераси (48 ва 2 мегапикселли) — SoC MediaTek Dimensity 810. Аккумулятор сиғими 4000 мА/соатга тенг бўлиб, 40 ваттли тезкор қувватланиш имкониятига эга. Бармоқ изи сканери ён томонидан ўчириб-ёқиш тугмасида жойлашган.

Honor смартфон учун 10 гигабайтли тезкор хотирани ваъда қилган, бироқ гап 8 гигабайтли тезкор ва 2 гигабайтли виртуал хотира ҳақида кетмоқда.

Бундан олдин Google янги смартфонлари тақдимотини ўтказгани, Оppo’нинг 625 долларлик флагмани Samsung Galaxy S21 Ultra’дан яхшироқ видеога олаётгани тўғрисида хабар берилганди.