Infinix компанияси улкан IPS-дисплейлар билан жиҳозланган Note 11 ва Note 11 Pro моделларини тақдим этди, деб хабар беради Hi-Tech.Mail.ru.
Экран ўлчами жиҳатидан янги моделлар телефонни эмас, балки кичикроқ планшетларни ёдга солади. Олдинги линейкалардан фарқли ўлароқ, Note 11 экранининг янгиланиш частотаси 120 герцни ташкил этади (олдин 90 герц эди). Сенсорли экранга тегиниш частотаси Infinix Note 10 Pro’дагидек қолган — 180 герц.
Смартфонларга 12 нанометрли технологик жараён асосида тайёрланган MediaTek Helio G96 процессори ўрнатилган. Pro-моделнинг ички хотираси 128 гигабайтни ташкил этади (microSD учун слот ҳам мавжуд), 8 гигабайтга тенг тезкор хотирани эса кенгайтириш имкони бор. Чунки Android 11 базасидаги ХОС 10 янги дастурий таъминоти 3 гигабайтли виртуал тезкор хотирани тақдим этишга қодир.
Линейкадаги базавий моделнинг асосий камераси 50 мегапикселлни ташкил этади ва 2 мегапикселли телевик ҳам мавжуд. Pro-моделнинг жамланмаси қизиқроқ: 64 мегапикселли асосий сенсор, 30 карра яқинлаштириш имкониятига эга 13 мегапикселли телеобъектив ва 2 мегапикселли чуқурликни ўлчовчи датчик. Иккала моделга ҳам 16 мегапикселли фронтал камералар ўрнатилган.
Янги қурилмалар сиғими 5000 мА/соатга тенг аккумуляторлар билан жиҳозланган бўлиб, у 33 ваттли тезкор қувватланиш функциясига эга. Pro-версия стереодинамиклари (юқори ва пастки) билан фарқланади.
Infinix Note 11 Pro модели уч хил рангда тақдим этилади: кул ранг, яшил ва ҳаворанг. Infinix Note 11 эса оқ, қора ва яшил рангларда сотувга чиқади. Смартфонлар нархи ҳозирча ошкор этилмаган.
Аввалроқ Oppo’нинг 625 долларлик флагмани Samsung Galaxy S21 Ultra’дан яхшироқ видеога олаётгани, геймерлар учун Black Shark 4S ва 4S Pro кучли смартфонлари тақдим этилгани тўғрисида хабар берилганди.
Изоҳ (0)