YouTube’даги 7,5 миллион обуначига эга TechRax каналида iPhone 13 Pro смартфони афсонавий Nokia 3310 тугмали телефони билан ўзаро мустаҳкамлик тестида таққослангани тасвирланган видео пайдо бўлди, деб хабар беради IXBT.
Таъкидлаш керакки, Nokia 3310 халқ орасида ишонч ва мустаҳкамлик сўзларининг синонимига айланиб улгурган. Ушбу телефон энг оғир синовлардан ўтган. Тажриба давомида иккала қурилма ҳам осмонўпар бинонинг 20-қаватидан ташлаб юборилган.
Телефонлар 20 қават баландликдан бирданига ерга тушмаган — улар мунтазам металл тўсиқларга урилган. Синов натижалари кутилмаган бўлиб чиқди: пластик корпусдаги Nokia 3310 қисмларга ажралиб кетган, зангламайдиган пўлатдан ишланган корпус ва Ceramic Sheild ҳимоя ойнасига эга iPhone 13 Pro қайта ва қайта баландликдан улоқтирилган. Ҳар сафар смартфон бир неча қаватни босиб ўтган.
Қурилманинг олд панели ва ҳимоя ойнаси борган сари синиб кетган, бироқ тестлар iPhone 13 Pro жуда яхши йиғилганини исботлаган. Натижада смартфон ишлашга яроқли ҳолатда қолган.
Қайд этилишича, Nokia 3310 ҳар сафар девор ёки асфальтга урилганида сочилиб кетган, аммо бунга телефоннинг ечиладиган аккумуляторига эга конструкцияси сабабчи. Тезлик билан йиғилган қурилма нормал ишлашда давом этаверган.
Аввалроқ iPhone 13 эгалари қувватлантиришдаги хатоликдан шикоят қилаётгани маълум бўлганди.
Изоҳ (0)