Honor kompaniyasi o‘tgan hafta ommaga taqdim etgan o‘zining yangi smartfoni — Honor Play6T Pro’ni sotuvga chiqardi, deb xabar beradi IXBT.
Mazkur smartfon dastlab Xitoyda sotuvga chiqadi. Xaridorlar qurilmaning 8/256 gigabaytli versiyasini 251 dollarga sotib olishi mumkin.
Ta’kidlanishicha, mazkur apparat Honor’ning 5G aloqa tarmog‘ini qo‘llab-quvvatlaydigan eng ingichka smartfoni hisoblanadi — uning qalinligi 7,45 millimetrni tashkil etadi. Vazni ham u qadar og‘ir emas — 175 gramm.
Honor Play6T Pro smartfoni Full HD+ (2388 x 1080 pikselli) sifatni qo‘llab-quvvatlovchi va 90 gertsli tasvir yangilanish chastotasiga ega 6,7 dyuymli IPS ekran bilan jihozlangan. Old qismdagi qirqimga o‘rnatilgan frontal kamera 8 megapikselni tashkil etadi. Asosiy kamerasi (48 va 2 megapikselli) — SoC MediaTek Dimensity 810. Akkumulyator sig‘imi 4000 mA/soatga teng bo‘lib, 40 vattli tezkor quvvatlanish imkoniyatiga ega. Barmoq izi skaneri yon tomonidan o‘chirib-yoqish tugmasida joylashgan.
Honor smartfon uchun 10 gigabaytli tezkor xotirani va’da qilgan, biroq gap 8 gigabaytli tezkor va 2 gigabaytli virtual xotira haqida ketmoqda.
Bundan oldin Google yangi smartfonlari taqdimotini o‘tkazgani, Oppo’ning 625 dollarlik flagmani Samsung Galaxy S21 Ultra’dan yaxshiroq videoga olayotgani to‘g‘risida xabar berilgandi.
Izoh (0)