iPhone 13 Pro Max қурилмаси Apple компанияси тарихидаги автономлиги энг юқори смартфонга айланди. Аппаратга сиғими 4352 мА/соатли аккумулятор ўрнатилганига қарамай, у сиғими 5000—6000 мА/соатга тенг аккумуляторлари мавжуд Android смартфонлардан анча яхши ишлайди, деб хабар беради IXBT.
PhoneArena ресурси томонидан эълон қилинган мақолада қайд этилишича, iPhone 13 Pro Max’дан кундалик оддий режимда фойланилганида унинг қуввати 3 кунга етган ва қувват даражаси 7 фоиз қолган. Бунда экрандан кунига уч соатга яқин фойдаланиш назарда тутилмоқда.
Таъкидланишича, дам олиш кунлари қувватлантиргичсиз сафарга отланилса, энергия тежамкорлиги режимини ёқиш керак, у экрандаги тасвирнинг максимал янгиланиш частотасини 60 герцга қадар блоклайди, бу эса аккумулятор қувватини янада кўпроқ тежаш имконини беради.
Тест давомида iPhone 13 Pro Max’нинг қуввати веб-саҳифаларни узлуксиз 18 соат 52 дақиқа ўқишга етиши маълум бўлган. Шунингдек, бир марта тўлган қувват билан YouTube’да 10 соат 23 дақиқа видео кўриш ёки 10 соат 29 дақиқа 3D-ўйинларни ўйнаш мумкин.
Аввалроқ америкалик шифокор iPhone 13 Pro Max’нинг камерасидан кўз касалликларига ташхис қўйишда фойдаланиб кўргани, iPhone 13 Pro Max автономлик бўйича Galaxy S21 Ultra’ни ортда қолдиргани тўғрисида хабар берилганди.
Изоҳ (0)