Mariupol meri Vadim Boychenkoning Associated Press agentligiga aytishicha, Rossiya qo‘shinlari shaharni qamal qila boshlaganidan beri Mariupolda 10 mingdan ortiq tinch aholi halok bo‘lgan. Merning so‘zlariga ko‘ra, qurbonlar soni 20 ming kishidan ortiq bo‘lishi ham mumkin, chunki Mariupol aholisining jasadlari “ko‘chalarni gilamdek qoplagan”.
Boychenko, shuningdek, Rossiya vakillari o‘lganlarning jasadlarini yig‘ib, savdo markazidagi muzlatgichlarda saqlayotganini da’vo qilmoqda. Aprel oyi boshida Mariupol shahar kengashi shaharda Rossiyaning ko‘chma krematoriyasi ish boshlaganini ma’lum qilgandi.
Mariupolda 120 ming tinch aholi qolgan, deydi Boychenko. Merning so‘zlariga ko‘ra, shahardan faqat rossiyalik ayirmachilar nazorat qilayotgan hududdagi “filtrlash lagerlari”dan o‘tganlar qo‘yib yuborilmoqda. “Filtrlash lagerlari”dan keyin odamlar Rossiya hududlariga jo‘natilmoqda.
Boychenkoning aytishicha, “filtrdan” o‘tmagan odamlar uchun qo‘lbola qamoqxonalar tashkil etilgan va kamida 33 ming kishi Rossiyaga olib ketilgan.
Boychenko o‘zi Mariupolda emasligini, ammo Ukrainadan chiqib ketmaganini aytdi. U shaharda sodir bo‘layotgan voqealar haqida bir necha manbalardan ma’lumot olganini ta’kidladi, biroq ularni oshkor qilmadi.
Mariupol mart oyi boshidan beri Rossiya qamalida. 7-aprel kuni Mariupol meri Vadim Boychenko shaharda kamida 5 ming kishi halok bo‘lganini aytgandi. Ukraina prezidenti Vladimir Zelenskiy 11-aprel kuni Mariupolda urush paytida o‘n minglab odamlar qurbon bo‘lgani haqida gapirdi.
Izoh (0)