Қорақалпоғистоннинг Хўжайли туманида она ўз фарзандларига зулм ўтказиб, уларни хўрлаётгани тасвирланган видео тарқалган эди. Кейинроқ ҳолат юзасидан жиноят иши қўзғатилди. Қорақалпоғистон ИИВ ходими билан суҳбатда бўлган она нима сабабдан фарзандларини калтаклаб келганини маълум қилгач, «Дарё»га аёлнинг қайнукаси алоқага чиқиб, келинойиси ёлғон маълумот берганини айтмоқда.
«Акам у аёл билан турмуш қуришидан аввал Хўжайли туманида у ҳақида турли хил гап-сўзлар тарқалганди. Ота-онам қарши бўлишса-да, акамнинг оёқ тираб олгани сабаб уйдагилар унинг хонадонига совчиликка боришга мажбур бўлган. Бироқ келинойимнинг ота-онаси совчиларга рад жавобини бериб, уни бошқа йигитга турмушга узатмоқчи эканини билдирган. Шунга қарамасдан, у акам билан қочиб кетиб, ижара уйда ноқонуний ва никоҳсиз яшаб юрган. Орадан кўп ўтмай акам Россияга ишлагани кетган ва икки йилгача қайтмаган», — дейди болаларнинг амакиси.
Мурожаатчининг айтишича, акаси А.А. икки йилдан сўнг Россиядан ота-онасининг уйига қайтган ва икки кундан сўнг яна хотини Ф.Х. билан яшашда давом этган.
«Биз асли тўрткўлликмиз. Акам эса ўша аёл ортидан кетиб, Хўжайли туманида уй-жой қилди. Лекин ота-онам бир нафар фарзанди борлиги учун уларнинг тинчини бузмади, турмушига аралашмади. Бу орада акам яна Россияга ишлагани кетди ва ҳаммаси шундан бошланди. Акам Россиядан қайтиб, бирга яшаганида ота-онам уларга тўсқинлик қилишмагани учун келинойим қўлларингдан ҳеч нима келмади, дея одам қулоғи эшитса, сапчиб тушадиган ҳақоратлар қилишни бошлади. Овозли хабарлару SMS’лар жўната бошлади. Акамнинг ҳурмати учун унинг беўхўшов хатти-ҳаракатларига эътибор бермай, ота-онамдан яширинча жиянларимни кўриб келардим. Яна давом этгач, кўнглимиз тамоман совиди», — дейди аёл ҳақидаги гапирган қайнука.
Мурожаатчи акасининг аёли Ф.Х. томонидан уларга юборилган овозли хабар ва SMS’ларни «Дарё»га ҳам берди.
«Биз келинойимнинг жиянларимни хўрлаган видеосини шу пайтгача кўрмагандик. Бу видеоларни 2022 йилнинг 27 март куни акам профилактика инспекторининг олдида бизга ҳам кўрсатди. Ва ўша пайтнинг ўзида ИИБ ходимига ариза берилди. Мен бу видеоларни профилактика инспекторига ҳам бериш кераклигини айтганимда акам рухсат бермади. Шу сабаб ИИБ ходими ҳам ҳолатни ўрганмай, аризани қайтариб берган. Унга ҳеч қандай чора кўрилмагани онамнинг тинчини бузди ва онам бу ҳолатга чидолмай видеоларни ижтимоий тармоқларда тарқатишга қарор қилди. Аслида биз бу видеоларни кўрганимизга эндигина 10-15 кун бўлди», — дейди суҳбатдош.
«Дарё»га тақдим қилинган Ф.Х.нинг овозли хабарлари ва SMS хабарномаларида жаҳл аралаш ҳақоратомуз сўзлар ишлатгани, вояга етмаган қизларини уриб, дўппослаб йиғлатаётгани эшитилади. Шунингдек, унинг эри А.А.ни севиши, севгани учун ҳам унинг барча хўрликларига чидаб яшаб келаётганини эшитиш мумкин.
Қорақалпоғистон ИИВ ходими билан суҳбатда бўлган эр А.А. фарзандларининг хўрланиш воқеаси у Россияда бўлган пайтида содир бўлганини айтган.
«Бу воқеа мен Россияда юрган пайтларда бўлган. Санаси аниқ эсимда йўқ. Менга хотиним қизларимни ҳақоратлаб, уриб, зулм ўтказаётгани кўринган видеони жўнатди. Илгари ҳам оилавий уруш, жанжал, можаро бўлиб турарди. Лекин бу галгиси ўтиб тушди. 2016 йилдан бери Россияга қатнайман. Ўзим пул жўнатиб туриш учун хотинимни хорижга ишлашга олиб кетишни истамагандим. Болаларга қара, деб яхшигина пул жўнатиб турганман. Биз қонуний никоҳда эмаслигимиз учун хотиним билан ота-онамиз оралари бузилган. Видеотасвирларни кўриб, қизларимнинг аҳволига ачиниб, 12 март куни Россиядан қайтдим. Айни пайтда қизларим ўзимда. Тўғриси, Россиядан қайтишим учун қизларимга зулм ўтказиб, видеоларни ўзи тарқатганидан сўнг яқинларим ҳам қаттиқ жаҳлланиб, ижтимоий тармоқларга тарқатишга мажбур бўлган.
Ҳозир икки ўртадаман. Хотиним кечирим сўраб, қайтиб қилмайман, деб узрини сўраб турибди. Болаларим етим қолмасин, деб ўзим ҳам ҳаракатдаман. Энди ўртада икки бола бор. Уларнинг тақдиридан қайғудаман. Ўзини тия олса, ўйлаб кўраман. Меҳрли бўлсин, урмасин, жабрини ўзи тортади. Болаларимга келсак, шифокорга кўрсатдик, оғир жароҳат йўқ, дейишди. Яхши аҳволда», — деди А.А.
Хўжайли туманидаги «Янги ҳаёт» МФЙ профилактика инспектори Давран Жакабаев «Дарё»га фуқаро Ф.Х. ҳақиқатан ҳам қонуний никоҳда бўлмаган эри А.А. ва унинг оила аъзоларини куракда турмайдиган, қўпол ва ҳақоратомуз сўзлар билан ҳақорат қилганини, ўз фарзандларини хўрлаб, ургани, бироқ шу пайтга қадар унинг устидан ҳеч қачон шикоят келиб тушмаганини маълум қилди. Шунингдек, ҳудуд инспектори айни пайтда фуқаро Ф.Х.нинг хатти-ҳаракатлари юзасидан тергов ишлари олиб борилаётгани ва у вақтинча ушлаб турилгани боис у билан боғланиш имкони йўқлиги билдирган.
Изоҳ (0)