Qoraqalpog‘istonning Xo‘jayli tumanida ona o‘z farzandlariga zulm o‘tkazib, ularni xo‘rlayotgani tasvirlangan video tarqalgan edi. Keyinroq holat yuzasidan jinoyat ishi qo‘zg‘atildi. Qoraqalpog‘iston IIV xodimi bilan suhbatda bo‘lgan ona nima sababdan farzandlarini kaltaklab kelganini ma’lum qilgach, “Daryo”ga ayolning qaynukasi aloqaga chiqib, kelinoyisi yolg‘on ma’lumot berganini aytmoqda.
“Akam u ayol bilan turmush qurishidan avval Xo‘jayli tumanida u haqida turli xil gap-so‘zlar tarqalgandi. Ota-onam qarshi bo‘lishsa-da, akamning oyoq tirab olgani sabab uydagilar uning xonadoniga sovchilikka borishga majbur bo‘lgan. Biroq kelinoyimning ota-onasi sovchilarga rad javobini berib, uni boshqa yigitga turmushga uzatmoqchi ekanini bildirgan. Shunga qaramasdan, u akam bilan qochib ketib, ijara uyda noqonuniy va nikohsiz yashab yurgan. Oradan ko‘p o‘tmay akam Rossiyaga ishlagani ketgan va ikki yilgacha qaytmagan”, — deydi bolalarning amakisi.
Murojaatchining aytishicha, akasi A.A. ikki yildan so‘ng Rossiyadan ota-onasining uyiga qaytgan va ikki kundan so‘ng yana xotini F.X. bilan yashashda davom etgan.
“Biz asli to‘rtko‘llikmiz. Akam esa o‘sha ayol ortidan ketib, Xo‘jayli tumanida uy-joy qildi. Lekin ota-onam bir nafar farzandi borligi uchun ularning tinchini buzmadi, turmushiga aralashmadi. Bu orada akam yana Rossiyaga ishlagani ketdi va hammasi shundan boshlandi. Akam Rossiyadan qaytib, birga yashaganida ota-onam ularga to‘sqinlik qilishmagani uchun kelinoyim qo‘llaringdan hech nima kelmadi, deya odam qulog‘i eshitsa, sapchib tushadigan haqoratlar qilishni boshladi. Ovozli xabarlar-u SMS’lar jo‘nata boshladi. Akamning hurmati uchun uning beo‘xo‘shov xatti-harakatlariga e’tibor bermay, ota-onamdan yashirincha jiyanlarimni ko‘rib kelardim. Yana davom etgach, ko‘nglimiz tamoman sovidi”, — deydi ayol haqidagi gapirgan qaynuka.
Murojaatchi akasining ayoli F.X. tomonidan ularga yuborilgan ovozli xabar va SMS'larni “Daryo”ga ham berdi.
“Biz kelinoyimning jiyanlarimni xo‘rlagan videosini shu paytgacha ko‘rmagandik. Bu videolarni 2022-yilning 27-mart kuni akam profilaktika inspektorining oldida bizga ham ko‘rsatdi. Va o‘sha paytning o‘zida IIB xodimiga ariza berildi. Men bu videolarni profilaktika inspektoriga ham berish kerakligini aytganimda akam ruxsat bermadi. Shu sabab IIB xodimi ham holatni o‘rganmay, arizani qaytarib bergan. Unga hech qanday chora ko‘rilmagani onamning tinchini buzdi va onam bu holatga chidolmay videolarni ijtimoiy tarmoqlarda tarqatishga qaror qildi. Aslida biz bu videolarni ko‘rganimizga endigina 10-15 kun bo‘ldi”, — deydi suhbatdosh.
“Daryo”ga taqdim qilingan F.X.ning ovozli xabarlari va SMS xabarnomalarida jahl aralash haqoratomuz so‘zlar ishlatgani, voyaga yetmagan qizlarini urib, do‘pposlab yig‘latayotgani eshitiladi. Shuningdek, uning eri A.A.ni sevishi, sevgani uchun ham uning barcha xo‘rliklariga chidab yashab kelayotganini eshitish mumkin.
Qoraqalpog‘iston IIV xodimi bilan suhbatda bo‘lgan er A.A. farzandlarining xo‘rlanish voqeasi u Rossiyada bo‘lgan paytida sodir bo‘lganini aytgan.
“Bu voqea men Rossiyada yurgan paytlarda bo‘lgan. Sanasi aniq esimda yo‘q. Menga xotinim qizlarimni haqoratlab, urib, zulm o‘tkazayotgani ko‘ringan videoni jo‘natdi. Ilgari ham oilaviy urush, janjal, mojaro bo‘lib turardi. Lekin bu galgisi o‘tib tushdi. 2016-yildan beri Rossiyaga qatnayman. O‘zim pul jo‘natib turish uchun xotinimni xorijga ishlashga olib ketishni istamagandim. Bolalarga qara, deb yaxshigina pul jo‘natib turganman. Biz qonuniy nikohda emasligimiz uchun xotinim bilan ota-onamiz oralari buzilgan. Videotasvirlarni ko‘rib, qizlarimning ahvoliga achinib, 12-mart kuni Rossiyadan qaytdim. Ayni paytda qizlarim o‘zimda. To‘g‘risi, Rossiyadan qaytishim uchun qizlarimga zulm o‘tkazib, videolarni o‘zi tarqatganidan so‘ng yaqinlarim ham qattiq jahllanib, ijtimoiy tarmoqlarga tarqatishga majbur bo‘lgan.
Hozir ikki o‘rtadaman. Xotinim kechirim so‘rab, qaytib qilmayman, deb uzrini so‘rab turibdi. Bolalarim yetim qolmasin, deb o‘zim ham harakatdaman. Endi o‘rtada ikki bola bor. Ularning taqdiridan qayg‘udaman. O‘zini tiya olsa, o‘ylab ko‘raman. Mehrli bo‘lsin, urmasin, jabrini o‘zi tortadi. Bolalarimga kelsak, shifokorga ko‘rsatdik, og‘ir jarohat yo‘q, deyishdi. Yaxshi ahvolda”, — dedi A.A.
Xo‘jayli tumanidagi “Yangi hayot” MFY profilaktika inspektori Davran Jakabayev “Daryo”ga fuqaro F.X. haqiqatan ham qonuniy nikohda bo‘lmagan eri A.A. va uning oila a’zolarini kurakda turmaydigan, qo‘pol va haqoratomuz so‘zlar bilan haqorat qilganini, o‘z farzandlarini xo‘rlab, urgani, biroq shu paytga qadar uning ustidan hech qachon shikoyat kelib tushmaganini ma’lum qildi. Shuningdek, hudud inspektori ayni paytda fuqaro F.X.ning xatti-harakatlari yuzasidan tergov ishlari olib borilayotgani va u vaqtincha ushlab turilgani bois u bilan bog‘lanish imkoni yo‘qligi bildirgan.
Izoh (0)