Бухоро шаҳрида 11 кишига хонадон ажратиб беришни ваъда қилиб, уларни чув туширган МЧЖ раҳбарига нисбатан жиноят иши қўзғатилди, деб хабар беради Бош прокуратура ҳузуридаги департамент.
Маълум қилинишича, департаментнинг Бухоро шаҳар бўлими томонидан фуқароларнинг ҳуқуқ ва манфаатларини ҳимоя қилиш юзасидан терговга қадар текширув ўтказилган. Текширув давомида «И.C.» МЧЖ масъул шахслари Ҳамза кўчасидаги икки қаватли уйни ўзбошимчалик билан бузиб, ушбу уйда истиқомат қилувчи 11 нафар фуқарони алдаб, уларга ушбу уй ўрнида қуриладиган 7 қаватли уйдан хонадон ажратиб беришни ваъда қилгани аниқланган.
Улар фуқаролардан жами 563,9 миллион сўм нақд пулни фирибгарлик йўли билан қўлга киритиб, маблағлар ҳисобидан Spark, Malibu ва Captiva русумли автотранспорт воситаларини харид қилиб, жиноий йўл билан топилган даромадларини легаллаштирган. Шунингдек, улар МЧЖнинг товар айланмасини камайтириб кўрсатиш орқали 408,7 миллион сўм солиқ ва бошқа мажбурий тўловларни тўлашдан бўйин товлаб келган.
Мазкур ҳолат юзасидан Жиноят кодексининг тегишли моддалари билан жиноят иши қўзғатилиб, тергов ҳаракатлари ўтказилмоқда.
Аввалроқ Фарғонада сув идораси раҳбари ва бошқа мансабдор шахслар 720 млн сўмдан ортиқ маблағни талон-торож қилгани аниқлангани, Олмалиқда қарийб 220 млн сўмлик насос агрегаторларини ўзлаштирган корхона раҳбари ушлангани тўғрисида хабар берилганди.
Изоҳ (0)