8 апрель куни Украинанинг Карпаторти вилояти ҳарбий маъмуриятининг Европа гуманитар хабларининг бирига Ўзбекистондан 34 тоннадан ортиқ гуманитар ёрдам етиб келган. Бу ҳақда Карпаторти вилоят раҳбари Виктор Микита маълум қилди.
Вилоят раҳбарининг сўзларига кўра, Ўзбекистондан дори-дармон, индивидуал дори қутилари, узоқ муддат сақланадиган озиқ-овқат маҳсулотлари, жами 400 минг донадан ортиқ бўлган 21 та позициядаги маҳсулот етиб келган.
«Юк самолётда етиб келди, кейин эса Карпатортига етказилди. Бу биз қисқа вақт ичида ҳарбий ҳолат шароитида йўлга қўйган логистика самарадорлигини яна бир бор исботлайди. Гуманитар ёрдам зудлик билан зарур нуқталарга жўнатилади», — дея таъкидлаган вилоят раҳбари.
«Gazeta.uz»нинг ёзишича, Виктор Микита Ўзбекистон ҳукуматига кўрсатган ёрдами ва Украинанинг Ўзбекистондаги фавқулодда ва мухтор элчиси Николай Дорошенкога мувофиқлаштириш ва самарали гуманитар йўлак учун миннатдорчилик билдирган. «Ишончим комилки, бу алоқалар бизга янада самарали ҳамкорлик қилиш имконини беради», — деган Карпаторти раҳбари.
Ўзбекистон ҳукумати Украинага гуманитар ёрдам юборилиши ҳақида хабар бермаган. 9 март куни АҚШ давлат котиби Энтони Блинкен «Украина ва Афғонистон халқига кўрсатаётган гуманитар ёрдами» учун Ўзбекистонга миннатдорлик билдирганди.
Эслатиб ўтамиз, 17 март куни Ўзбекистон ташқи ишлар вазири Абдулазиз Комилов Украина атрофида бўлаётган можаро юзасидан Ўзбекистоннинг позициясини айтганди. «Ўзбекистон Украина мустақиллиги, суверенитети ва ҳудудий яхлитлигини тан олади. Биз Луганск ва Донецк мустақиллигини тан олмаймиз», — дея таъкидлаган ТИВ раҳбари.
Изоҳ (0)