Тиббий-ижтимоий хизматларни ривожлантириш агентлиги томонидан «Саховат» ва «Мурувват» муассасаларидаги мавжуд шарт-шароитларни янада яхшилаш, қўшимча бино қуриш юзасидан маҳаллий бюджетлар ҳисобидан 14 миллиард сўм маблағ сарфланган. Бу ҳақда 9 апрель куни Тошкент вилоятидаги тиббий-ижтимой муассасаларда бўлиб ўтган пресс-тур давомида маълум қилинди, деб хабар берди «Дарё» мухбири.
Қайд этилишича, «Мурувват» ва «Саховат» уйларида ўзгалар парваришига муҳтож, ётоқ ҳолдаги кексалар ва ногиронлиги бўлган шахсларни шахсий гигиена воситалари билан бюджет маблағлари ҳисобидан таъминлаш тизими жорий этилган. Унга ўтган давр мобайнида, қарийб 5,7 миллиард сўм маблағ ажратилган.
Шунингдик, 2021 йилда агентлик тизимидаги 10 та тиббий-ижтимоий муассасаларда жами 73 миллиард сўмлик қурилиш, реконструкция ва мукаммал таъмирлаш ишлари амалга оширилгн.
2021 йил 1 апрелдан бошлаб 11 мингдан зиёд соҳа ходимларининг ойлик маошлари оширилди. Жумладан:
«Саховат» ва «Мурувват» интернат уйлари ҳамда Уруш ва меҳнат фахрийлари учун республика пансионатининг раҳбар ва шифокорлар ойлик лавозим маоши 1,5 баробарга, ўрта ва кичик тиббиёт ходимлари ойлик лавозим маоши 2 баробарга —бошқа барча ходимлар ойлик лавозим маоши 1,2 баробарга;
Агентлик марказий аппарати ходимларининг ойлик лавозим маоши 1,5 баробарга, унинг ҳудудий бошқармалари ва туман (шаҳар) бўлимлари ҳамда Республика тиббий-ижтимоий экспертиза инспекцияси марказий аппарати ва унинг ҳудудий комиссия ходимлари ойлик лавозим маоши 1,2 баробарга оширилган миқдорда тўлов амалга оширилмоқда.
Бундан ташқари, 2022 йилда ногиронлиги бўлган шахс ёки унинг вакили томонидан тиббий-ижтимоий хизматлар бўйича тезкор мурожаат қилиш, шунингдек, протез-ортопедия мосламалари ва реабилитация қилиш техник воситаларига муҳтож бўлган шахсларнинг шаффоф электрон навбат тизими яратилмоқда. Мазкур мосламалар ва воситалар билан ўз вақтида таъминлашни амалга ошириш учун барвақт зарур захира яратиш мақсадида «Ижтимоий хизмат» электрон платформаси ишлаб чиқилмоқда.
Статистик маълумотларга кўра, дунёда 1,1 миллиард нафар «катта авлод» вакиллари ҳамда 1 миллиард – ногиронлиги бўлган шахслар истиқомат қилади. Ўзбекистонда эса, «катта авлод» вакилларининг сони 3 миллион дан ортиқ, ногиронлиги бўлган шахсларнинг сони эса қарийб 1 миллион нафарни ташкил қилади. Республикада 135 минг нафардан муҳтож фуқароларга турли тиббий-ижтимоий хизмат турлари кўрсатилмоқда.
Эслатиб ўтамиз, президентнинг 2021 йил 25 мартдаги «Кекса ва ногиронлиги бўлган шахсларни ижтимоий қўллаб-қувватлаш, ‘Саховат’ ва ‘Мурувват’ интернат уйлари тизимини янада ривожлантириш тўғрисида»ги фармонига асосан Соғлиқни сақлаш вазирлиги ҳузуридаги Тиббий-ижтимоий хизматлар агентлиги ва унинг ҳудудий бўлинмалари негизида Тиббий-ижтимоий хизматларни ривожлантириш агентлиги ва унинг ҳудудий бўлинмаларини ташкил этиш белгиланганди.
Ўзбекистон ҳукуматининг 13 апрелдаги қарори билан Тиббий-ижтимоий хизматларни ривожлантириш агентлиги раҳбарияти тайинланди.
Изоҳ (0)