Халқ таълими вазирлиги АҚШ Халқаро тараққиёт агентлиги билан ҳамкорликда 1—4-синфлар учун она тили, ўқиш саводхонлиги ва математика фанларидан муқобил дарсликлар ишлаб чиқди. Бу ҳақда Республика таълим маркази «Дарё»га маълум қилди.
Марказ муқобил дарсликларни ишлаб чиқишда фаол иштирок этган бир неча ўзбекистонлик мутахассислар фикрларини келтирди.
Математика дарслиги муаллифи Баҳодир Ҳайдаров бундай дарсликлар янги форматда бўлиб, жаҳон стандартларига тўлиқ мос келади.
«Биз математика фани бўйича муаллифлар гуруҳи ишимизни таълим стандартларини таҳлил қилишдан бошладик. Жумладан, дунёда илғор саналган давлатларнинг таълим стандартларини ўргандик ва ўзимизнинг амалдаги стандартларимизни улар билан бирга таққосладик. Натижаларга қаралса, бизда тахминан 25 фоиз стандартлар устма-уст тушиши, яна 25 фоиз ҳолатда анча кучли талаблар қўйилгани аниқланди. Энг асосийси, стандартларнинг қарийб ярми ноаниқ тузилгани маълум бўлди. Шундан келиб чиқиб, стандартларга аниқлик киритдик ва 2021 йилда Халқ таълим вазирлигига янги, қайта ишланган стандартларнинг асосий вариантини тақдим қилдик. Тақризлардан кейин бу стандартларга яна ўзгартиришлар киритилди ва ҳозирги ҳолат вужудга келди. Айнан мана шу стандартлар дарсликларни ишлаб чиқариш учун асос бўлди», — дейди муаллиф.
Тошкент шаҳар 144-мактаб бошланғич синф ўқитувчиси Нодира Азизова янги математика дарслиги аввалгисидан анча қулайлигини таъкидлади.
«Шундай ўқувчилар бор эдики, мисолларни ишлай олмадими бўлди, унинг учун математика қизиқ эмас, у математикани ишламай қўярди. Ҳозирги яратилган дарсликларнинг эътиборли тарафи шундаки, унда ҳар бир ўқувчига эътибор қаратилган. Дарсликни очсак бир мавзу учта ёки тўртта топшириқдан иборат. Бошида бизга ҳам ғайриоддий туюлди, сабаби 3-4 та мисолни бола бир пасда ишлаб қўяди, қолган вақт нима қиламиз, деган савол туғилди. Аммо ишлаш жараёнида амин бўлдикки, аслида бу тўғри ва осон йўл экан. Қарайдиган бўлсак, 15 дақиқада ўқувчи топширадиган амалий топшириғи дарсликда бўлса, қолгани ўқитувчининг китобида кўрсатилган. Ўқитувчига тегишли китобда у дарснинг ҳар бир босқичи, нима қилиш керак, қандай топшириқлардан фойдаланади, бу топшириқларни бажаришда ўқувчиларга қандай саволлар берилади, буларнинг барчаси барафсил кўрсатилган», — деди ўқитувчи.
Халқ таълими вазирлиги Таълим сифати жараёнларини мувофиқлаштириш департаменти директори Лазиз Хўжақуловнинг алоҳида таъкидлашича, қайсидир фандан биттадан кўра кўпроқ дарслик бўлиши мумкин.
«Буни ҳеч ким қонун билан чекламаган. Фақат муқобил дарсликларни ёзадиган мутахассисларнинг бор ёки йўқлиги, салоҳияти ва моддий масалалар ўртада турибди. Вазирлик муқобил дарсликлар парадигмасига қарши эмас. Қайси дарсликдан фойдалангандан қатъи назар ўқувчига сифатли билим бериб, давлат таълим стандартларида белгиланган билим ва кўникмаларни ўқувчиларда шакллантириш мақсадимиз», — деди Лазиз Хўжақулов.
Она тили ва ўқиш саводхонлиги дарслиги муаллифи Шокир Турсуннинг айтишича, муқобил дарсликларнинг борлиги ўқитувчи учун ҳам, ўқувчи учун ҳам фойдали.
«Муқобил дарсликни 2 та жамоа ёзгандан кейин 2 хил дарслик ўзаро мусобақалашади. Охир оқибатда ўқувчи бундан фойда кўради. Ўқитувчида ҳам дарс ўтиши учун керак бўладиган материални танлаш имконияти мавжуд бўлади», — дейди у.
Аввалроқ USAID Ўзбекистонда мактаб дарсликлари сифатини яхшилаш учун 29 миллион доллар ажратаётгани хабар қилинганди. Шунингдек, сайтда 2021–2022-ўқув йили учун Республика таълим маркази Ўзбекистондаги 1—2-синф ўқувчиларига янги авлод дарсликларини тақдим этгани бўйича материал эълон қилинган.
Изоҳ (0)