Хитойнинг 18 миллион аҳолига эга Гуанчжоу саноат шаҳрида коронавирусга чалиниш ҳолатларининг кўпайиши сабабли қатор чекловлар жорий қилинди. Бу ҳақда Associated Press хабар бермоқда.
Шаҳарга кириш деярли тўлиқ чекланган, шаҳарни тарк этишга фақат фавқулодда ҳолатларда ва ПЗР-тести манфий бўлганда рухсат берилади. Мактабларда бошланғич ва ўрта синфлар учун дарслар масофавий шаклга кўчирилди. Шаҳар аҳолисидан COVID-19 га оммавий тест олинмоқда.
11 апрель, душанба куни Гуанчжоуда COVID-19 билан касалланишнинг расмий ўсиши 27 тани ташкил этди, ўтган ҳафта ушбу кўрсаткич 23 та эди.
Эслатиб ўтамиз, 26 миллион аҳолига эга Шанхай март ойининг охиридан бери қаттиқ локдаун остида. 11 март куни куни расмийлар шаҳарда бир суткада 26,087 кишида коронавирус аниқлангани ҳақида хабар берди, уларнинг атиги 914 нафарида касаллик симптомларини намоён қилган.
Хитой COVID-19 га нисбатан «нол бардошлик» сиёсатига эга бўлган дунёдаги кам сонли давлатлардан бири бўлиб қолмоқда. Бу вирус тарқалишини қатъий локдаун ва касалланган фуқаролар билан алоқада бўлганлар учун мажбурий карантин орқали чеклашни англатади. Бундай сиёсат Пекинда 2022 йил 4—20 февраль кунлари бўлиб ўтган 24-қишки Олимпия ўйинларига тайёргарликнинг бир қисми сифатида бошланди, бироқ расмийлар уни ўйинлар тугаганидан кейин ҳам давом эттиришга қарор қилди.
Изоҳ (0)