Хорватия 18 нафар Россия дипломати ва Загребдаги Россия элчихонасининг олти нафар маъмурий-техник ходимларидан мамлакатни тарк этишни талаб қилди. Бу ҳақда мамлакат Ташқи ишлар вазирлигига таяниб, Jutarnji list хабар берди.
Вазирлик Россиянинг «Украинага қарши босқини ва кўп сонли жиноятларини кескин қоралаган». Улар Москвани «ҳарбий ҳаракатларни зудлик билан тўхтатиш ва Россия қўшинларини Украина ҳудудидан олиб чиқиб кетиш, шунингдек, аҳолини зудлик билан эвакуация қилиш ва гуманитар ёрдам етказилишини таъминлаш»га чақирган.
Россиянинг Хорватиядаги элчихонаси мамлакат ТИВ ходимларнинг бир қисмини мамлакатдан чиқариб юборишни талаб қилганини тасдиқлаган. «Элчи Андрей Нестеренконинг ТИВга чақирилгани ва бир нечта россиялик дипломатларни мамлакатда чиқариб юбориш бўйича нота олганини тасдиқлаймиз», — дейилади дипломатик миссия хабарида.
Бундан олдин Дания, Франция, Германия, Польша, Болгария, Латвия, Литва ва Эстония Россиянинг дипломатик ваколатхоналари ходимларини чиқариб юборишини маълум қилганди. Европа Иттифоқининг бир қанча давлатлари, жумладан, Бельгия, Нидерландия ва Ирландия ҳам ўнлаб россиялик дипломатларни чиқариб юборди.
Изоҳ (0)