Эрон террорчилик фаолияти ва инсон ҳуқуқлари бузилишига алоқадор бўлган шахслар киритилган санкциялар рўйхатини янгилади. Ундан мос равишда 9 ва 15 нафар АҚШ фуқароси ўрин олган, деб хабар берилади мамлакат ТИВ хабарида.
«Ушбу шахслар Эрон халқи ва ҳукуматига қарши АҚШнинг бир томонлама мажбурлов чораларини (жиноий санкцияларини) қўллаб-қувватлайди, ташкиллаштиради, амалга оширади ва кучайтиради, террористик гуруҳлар ва террорчилик ҳаракатларини молиялаштиради ва қўллаб-қувватлайди, шунингдек, сионистик режимнинг минтақада ўз ролини ўйнаган репрессив ҳаракатларини, айниқса, мазлум Фаластин халқига қарши ҳаракатларини амалга оширади», — дейилади хабарда.
Рўйхатдан Американинг истеъфодаги юқори мартабали ҳарбийлари (масалан, собиқ армия штаби бошлиғи кичик Жорж Кейси, АҚШ армиясининг Афғонистондаги собиқ қўмондони Остин Миллер), дипломатлар (АҚШнинг Ливандаги элчиси Дороти Ши, АҚШнинг Қуддусдаги муваққат ишлари вакили Жонатан Шраер ва ҳоказо), амалдорлар (Савдо ва Молия вазирликларининг собиқ раҳбарлари Уилбур Росс ва Жейкоб Лю, шунингдек, турли вақтларда молия вазирининг ўринбосарлари бўлиб ишлаган бир нечта амалдор), собиқ президент Дональд Трампнинг адвокати, Kharon компанияси ходимлари ўрин олган.
Аввалроқ АҚШ президентининг администрацияси Эрон Ислом инқилоби муҳофизлари корпусини террористик ташкилотлар рўйхатидан чиқариш ниятида экани тўғрисида хабар берилганди. Бу каби чора Теҳрон минтақада кескинликни камайтириш ва ядро битимига рози бўлса қўлланилиши мумкин. 40 йилдан ортиқ вақтдан бери давом этаётган Эронга қарши санкциялар кенг кўламли иқтисодий чораларни ўзида жамлаган.
Изоҳ (0)