Саудия Арабистони уч йил ичида биринчи марта хориж фуқароларига Ҳаж зиёратини амалга оширишга рухсат берди

Саудия Арабистони хориж фуқароларига Ҳаж зиёратини амалга оширишга рухсат берди. Ўтган икки йил давомида коронавирус пандемияси сабаб хорижликлар Ҳаж зиёратига қўйилмаётган эди. 2022 йилда зиёратчиларнинг умумий сони 1 миллион кишига етди, деб хабар беради Саудия Арабистони ахборот агентлиги.

Маълум қилинишича, 2022 йилда коронавирусга қарши эмланган, 65 ёшгача бўлган фуқароларнинг зиёратларни амалга оширишига рухсат этилади. Хорижликлар, шунингдек, Саудия Арабистони ҳудудига киришдан узоғи билан 72 соат олдин коронавирусга топширилган тестнинг манфий натижасини тақдим этиши керак бўлади.

2020 ва 2021 йилларда подшоҳлик ҳукумати хорижлик зиёратчиларнинг Ҳаж амалларини бажаришига рухсат бермади. 2021 йил охирида Татаристон президенти Рустам Минниханов Саудия Арабистонига ташриф чоғида «Спутник V» вакцинаси билан эмланган россияликларнинг Ҳаж зиёратини амалга оширишига рухсат сўраган. Подшоҳлик бунга розилик берган.

Бундан ташқари, эмланган зиёратчиларнинг мамлакатда бўлиш муддати 10 кундан 30 кунга қадар узайтирилган. Саудия Арабистонига келувчилар Pfizer, Moderna, AstraZeneca ёки бир компонентли Johnson & Johnson вакциналари билан эмланган бўлиши керак. Хитойнинг Sinopharm ва Sinovac вакцинаси билан эмланганлар юқоридаги уч турдаги вакцинанинг исталган бири билан қўшимча эмланса, мамлакатга ҳар қандай мақсадда ташриф буюришига рухсат этилади. Акс ҳолда уларнинг фақат зиёрат қилишига рухсат берилган.

Аввалроқ Ўзбекистонда Умра зиёрати қачондан бошланиши ва унинг нархлари ҳақида маълумот берилганди. Унда 2020 йил февраль ойига қадар Умра зиёрати учун охирги белгиланган тўловларни амалга оширганлар қўшимча равишда 4 770 000 сўм маблағ тўлаши ҳам келтириб ўтилган эди. Ижтимоий тармоқларда ушбу қўшимча тўлов борасида турли мулоҳазалар билдирилганидан сўнг, Мусулмонлар идораси ҳолатга изоҳ бериб, коронавирус пандемияси Умра хизматлари кўрсатишга ҳам салбий таъсир кўрсатганини маълум қилди. Қайд этилишича, меҳмонхонада 4 кишилик хонага 2 нафар зиёратчи, 50 ўриндиқли автобусга 25 киши жойлаштириш каби талаблар ўрнатилган. 22 январь куни эрта тонгда Умра—2022 мавсумининг илк зиёратчилари Тошкент халқаро аэропортидан Саудия Арабистонига жўнаб кетганди.