Латвия 9 майни нишонлашни тақиқлаб, ушбу санани Украинада ҳалок бўлганларни хотирлаш куни деб эълон қилди

Латвия парламенти 2022 йилда 9 майни Украинадаги жанговар ҳаракатлар пайтида ҳалок бўлган тинч аҳоли ва украиналик ҳарбий хизматчиларни хотирлаш куни деб эълон қилиш тўғрисидаги қонунни қабул қилди.

Шу куни президент қароргоҳи, Сейм (парламент) ва ҳукумат бинолари, бошқа давлат муассасалари, шунингдек, турар жой бинолари яқинида мотам байроғи кўтарилиши керак. Латвия байроғи ёнига Украинанинг мотам байроғи илинади.

Бундан ташқари, тадбирни оммавий нишонлаш бекор қилинмоқда. Фақат марҳумларни хотирлаш учун митинглар, юришлар ёки пикетлар ўтказишга рухсат берилади. 9—10 май кунлари мушакбозлик ўтказиш тақиқланган, қонунбузарлар жавобгарликка тортилади. Қонун 2022 йилнинг 11 майига қадар амалда бўлади.

31 март куни парламент «Оммавий кўнгилочар ва байрам тадбирларининг хавфсизлиги тўғрисида»ги қонунга ўзгартириш киришни маъқуллаган эди. Қонун 9 майда Ғалаба куни байрамини нишонлашни амалда тақиқлайди. Тузатишларга кўра, Совет армиясига тегишли ҳар қандай ёдгорлик, жумладан, Пардаугаведаги Ригани озод этганлар ҳайкалининг 200 метр атрофида тадбир ўтказиш тақиқланди.

Оммавий тадбирларда фашистлар ва коммунистик тузумлар мафкурасини ўз ичига олган тадбирларни, шу жумладан, ушбу мафкура вакилларининг туғилган кунларини, жанглар ва ғалабаларни хотирлаш кунларини, ҳудудларнинг ёки унинг бир қисмининг босиб олинишини улуғлаш мумкин эмас. Бундай тадбирларнинг мақсади тоталитар тузумларни улуғлаш ёки содир этилган жиноий ҳаракатларни оқлаш билан боғлиқ бўлмаган ва таълим, илмий ёки бадиий мақсадларда фойдаланилган ҳоллар бундан мустасно. Шунингдек, Сейм Россия расмийлари Украинадаги ҳарбий операция вақтида ишлатадиган З ҳарфидан фойдаланишни тақиқлаган.

З ва V ҳарфларидан, шунингдек, Георгий лентасидан фойдаланиш Молдова парламенти томонидан ҳам тақиқланган. Қонунбузарлар жаримага тортилади. З рамзи Германиянинг қатор федерал ҳудудларидан тақиқланди. Бундан ташқари, Эстония адлия вазири Марис Лаури ҳам ундан фойдаланишни тақиқлашни таклиф этган.

Россия Мудофаа вазирлигининг маълум қилишича, З ҳарби «Ғалаба учун», V эса «Куч адолатда» а «Вазифа бажарилади» маъноларини билдиради. Даставвал ушбу ҳарфлар Украинадаги махсус операцияда иштирок этган ҳарбий техникаларга туширилган эди.