Нью-Йорк бош прокурори штат судидан АҚШнинг собиқ президенти Дональд Трампни судга ҳурматсизлик қилгани учун жавобгарликка тортишни сўради, деб хабар беради Reuters.
Агентлик маълумотларига кўра, сиёсатчи суд органларига молиявий операциялари ва Trump Organization компаниясини тергов қилиш юзасидан ҳужжатларни тақдим этишдан бош тортган. Бу каби ҳаракат «судга ҳурматсизлик» деб баҳоланади.
Бош прокурор Летиция Жеймс судга киритган аризасида Трамп суднинг 31 мартга қадар ҳужжатлар ва маълумотларни тақдим этиш тўғрисидаги қарорини бажармаган. Шу сабабли прокурор Трампни 10 минг доллар жаримага тортишни талаб қилган.
«Суд қарори аниқ эди: Дональд Трамп бизнинг чақириғимизга риоя қилиши ва тегишли ҳужжатларни менинг идорамга топшириши керак. Трамп суднинг қарорига бўйсуниш ўрнига, унда қочишга уринмоқда», — дейилади Жеймснинг баёнотида.
Прокуратуранинг айблов хулосасида 15 та банд бор, жумладан, солиққа оид фирибгарлик, ҳужжатларни қалбакилаштириш ва ўта йирик миқдорда ўзлаштириш.
Таъкидлаш керакки, Трампнинг ўзи бир неча бор қонунбузарликлари тўғрисидаги айбловларни рад этиб, терговни «жодугар ови» деб атаган ва 2021 йилда прокурорни судга берганди.
«Биз Бош прокуратура томонидан берилган бемаъни ва асоссиз аризага кескин қаршилик кўрсатишга тайёрмиз. Мижозимиз йиллар давомида Бош прокуратура томонидан тақдим этилган маълумотлар бўйича кўплаб сўровларни доимий равишда бажариб келган», — дейди Трампнинг адвокати Алина Хабба.
Нью-Йорк бош прокурорининг Trump Organization устидан текшируви 2019 йилдан буён давом этмоқда. Аввалроқ Манхэттен округи прокурори Сайрус Венс Трампнинг молиявий ишларида штат қонунларининг эҳтимолий бузилиш ҳолатларини аниқлаш мақсадида жиноий иш қўзғатганини маълум қилган эди. Венснинг идораси Трампнинг солиқ декларациясини ўз ичига олган миллионлаб саҳифадан иборат ҳужжатларни текширмоқда.
Изоҳ (0)