Россияда коронавирусга қарши бурунга пуркаладиган вакцина фуқаролик муомаласига киритилди. Бу ҳақда Гамалея номидаги эпидемиология ва микробиология илмий маркази директори Александр Гинсбург маълум қилди, деб ёзмоқда «РИА Новости».
1 апрель куни Россия Соғлиқни сақлаш вазирлиги COVID-19 га қарши дунёдаги биринчи бурун вакцинасини рўйхатдан ўтказганини эълон қилди.
«У расман фуқаролик муомаласига кирди ва сифат назоратидан ўтди. Ушбу вакцинадан ҳудудлар бўйлаб фойдаланиш режалаштирилган. Вакцина таркиби ‘Спутник V’ таркиби билан бир хил», — деди Гинсбург.
Қайд этилишича, препарат «Спутник V» каби икки компонентдан иборат бўлиб, уч ҳафталик интервал билан бурун бўшлиғига махсус пуркагич ёрдамида юборилади.
У нафас йўлларининг шиллиқ қавати юзасида коронавирус инфекциясига қарши шиллиқ қават иммунитетини ҳамда қонда гуморал ва ҳужайрали иммунитетни ҳосил қилади.
Препаратнинг йўриқномасида кўрсатилганидек, бурун вакциналаридан фойдаланишга қарши кўрсатмалар кучли аллергик реакциялар, препаратнинг таркибий қисмларига юқори сезувчанлик ва ўткир касаллик ҳолатлари ҳисобланади. Кучли сурункали касалликни бошдан кечираётган беморларда вакцинация тузалгандан ёки ремиссия бошланганидан икки-тўрт ҳафта ўтгач амалга оширилиши мумкин.
Бундан ташқари, вакцина жигар ва буйракларнинг сурункали касалликларида, гематопоэтик тизимнинг оғир касалликларида, эпилепсия ва марказий асаб тизимининг бошқа касалликларида, ўткир коронар синдром ва мияда қон айланишининг ўткир бузилиши, миокардит, эндокардит ва перикардитда эҳтиёткорлик билан қўлланиши керак, дея таъкидланган йўриқномада.
Шу билан бирга, препарат ҳомиладор аёллар ва эмизикли оналар учун қарши кўрсатмаларга эга эмас, аммо уни ҳомиланинг 22-ҳафтасидан бошлаб ва ундан кутилаётган фойда она учун потенциал хавфдан юқори бўлган ҳолларда қўллаш керак.
2021 йилнинг февраль ойида Москвада коронавирусга қарши вакцинанинг бурунга пуркаладиган шаклини уч босқичли клиник синовдан ўтказиш бошланганди. Ноябрь ойида эса Россия президенти Владимир Путин коронавирусга қарши қайта эмланиш доирасида бурунга пуркаладиган вакцинани ҳам синаб кўрганини айтган.
Изоҳ (0)