Канада бош вазири россиялик дипломатларнинг чиқариб юборилишига қаршилик билдирди

Канада россиялик дипломатларни чиқариб юбормайди. Бу ҳақда мамлакат бош вазири Жастин Трюдо маълум қилди, деб хабар беради Radio Canada.

Унинг сўзларига кўра, бу қарши жавоб чораси кўрилишига олиб келиши мумкин. Натижада Оттава Москвадан маълумотларни олиш имкониятидан маҳрум бўлади ва Украинадаги можаро туфайли юзага келган инқирозни дипломатик йўл билан ҳал қилишга салбий таъсир кўрсатади.

«Биз жуда эҳтиёткор бўлишимиз керак. Инқирозли даврда дипломатик масалалар юзага келган бир вақтда Москвада ресурслардан маҳрум бўлишни истамаймиз», — дейди у. Трюдонинг таъкидлашича, бу борадаги қайта жавоб Оттавани Россиядаги руслар ва канадаликлар билан алоқани қўллаб-қувватлаш имкониятидан чеклаб қўяди. У Канададаги россиялик дипломатлар ёлғон маълумотларни тарқатмаётганини қайд этган.

Radio Canada маълумотларига кўра, дипломатларни чиқариб юборишни Канада парламентининг мухолиф тарафи — Консервативлар партияси талаб қилмоқда.

Аввалроқ Россиянинг Канададаги элчиси Олег Степанов мамлакат Ташқи ишлар вазирлигига Бучадаги вазият сабаб чақирилганини маълум қилганди. У ташқи ишлар вазирининг биринчи ўринбосари Марте Морган билан гаплашган ва суҳбат якунида Канаданинг содир бўлган воқеа бўйича позицияси «қаттиқ ва ултиматив» экани билдирилган.

Ўз навбатида Австрия Ташқи ишлар вазирлиги Россиянинг Венадаги элчихонасининг уч нафар ходими ҳамда Зальцбургдаги бош консулликнинг бир нафар ходими 12 апрелгача мамлакатни тарк этиши кераклигини маълум қилди.

Россия Ташқи ишлар вазирлиги расмий вакили Мария Захарова Россия бунга жавобан худди шу каби чорани қўлланишини ваъда қилган.

Эслатиб ўтамиз, аввалроқ Дания, Франция, Германия, Польша, Болгария, Латвия, Литва ва Эстония Россиянинг дипломатик ваколатхоналари ходимларини чиқариб юборишини маълум қилганди. Европа Иттифоқининг бир қанча давлатлари, жумладан Бельгия, Нидерландия ва Ирландия ҳам ўнлаб россиялик дипломатларни чиқариб юборди.