Россия армияси Украинанинг Киев ва Чернигов вилоятлари ҳудудидан тўлиқ олиб чиқиб кетилди. Бу ҳақда Пентагон матбуот котиби Жон Кирби журналистларга маълум қилган.
Украина Бош штабининг маълум қилишича, ҳозирда Россия Қуролли кучлари бор диққатини мамлакат шарқига қаратган бўлиб, уларнинг мақсади Донецк ва Луганск ҳудудларини тўлиқ назорат остига олиш. Украиналик ҳарбийларнинг маълумотларига кўра, Россия армияси Слобожанскоэ, Донецк, Южнобужскоэ ва Таврическоэ йўналишларида олдинга силжимоқда.
Пентагон вакилининг фикрича, Россия президенти Владимир Путин Украинада «ўзининг бирорта стратегик мақсадига» эриша олмаган ва фақатгина кичик аҳоли пунктларини назорат остига олишга муваффақ бўлган.
Кремль қўшинларнинг Киевдан олиб чиқилиши тинчлик музокаралари учун қулай шарт-шароит яратишга қаратилган хайрихоҳлик ҳаракати деб атаган. Россия президентининг матбуот котиби Дмитрий Песковнинг сўзларига кўра, қўшинларни олиб чиқиш бўйича буйруқни шахсан Владимир Путин берган.
Пентагон вакиллари кейинчалик Россия қўшинлари яна Киевга қайтиши мумкинлигини истисно этмаган. Киев ва Чернигов вилоятларидан олиб чиқилаётган қўшин таркибида 24 минг ҳарбий хизматчи борлиги айтилмоқда.
Аввалроқ Россия томонидан Украинада ҳарбий операция бошланганидан бери 1480 нафар тинч аҳоли ҳалок бўлгани, шунингдек, 2195 киши яралангани тўғрисида хабар берилганди. Гап фақатгина тасдиқланган ҳолатлар ҳақида кетмоқда, ҳақиқий рақамлар бундан кўп бўлиши мумкин.
Россия—Украина урушига оид тезкор, ишончли янгиликлар ва маълумотларни «Дарё»нинг Live саҳифаси орқали кузатиб боринг → @Daryo_Live
Изоҳ (0)