Буркина-Фасо собиқ президенти Блез Компаоре ўзидан олдинги етакчи Том Санкаранинг ўлимидаги иштироки учун умрбод қамоқ жазосига ҳукм этилди, деб хабар беради Deutsche Welle.
Нашр маълумотларига кўра, собиқ президент хавфсизлик хизматининг собиқ раҳбари Гиасинт Кафандо билан бирга сиртдан айбланган, у ҳам умрбод қамоқ жазосига ҳукм қилинган.
«Ўтган йилнинг октябрида бошланган трибунал ушбу шахсларни давлат хавфсизлигига тажовуз қилиш, қотилликка шериклик ва мурдани яширишда айбдор деб топди», — дейилади хабарда.
«Одамлар бошқа одамларни ўлдириб, мамлакат тараққиёти жараёнини тўхтатиб, жазосиз қолиши яхши эмас», — деган Санкаранинг беваси Мариам.
Том Санкара Буркина-Фасонинг ҳурматли раҳбари ва панафрика ҳаракати тарафдори бўлган. «Африкалик Че Гевара» номини олган сиёсатчи мамлакатда қашшоқликни қисқартириш йўлида кенг кўламли ислоҳотларни ўтказиш учун 1983 йилда яқин дўсти Компаоре билан ҳокимиятни эгаллаган.
У мамлакат номини Буркина-Фасога ўзгартирган ва ҳашаматли хизмат автомобилларини анча арзонларига алмаштирган. Унинг режими аёлларнинг имкониятларини кенгайтириш, озиқ-овқат маҳсулотларини ишлаб чиқариш ва атроф-муҳит сиёсатига устувор аҳамият берган. 1987 йилда 37 ёшли Санкара 12 киши билан бирга отиб кетилган. Шундан сўнг Компаоре мамлакатда ҳокимият тепасига келиб, уни 27 йил давомида бошқарган.
Изоҳ (0)