Burkina-Faso sobiq prezidenti Blez Kompaore o‘zidan oldingi yetakchi Tom Sankaraning o‘limidagi ishtiroki uchun umrbod qamoq jazosiga hukm etildi, deb xabar beradi Deutsche Welle.
Nashr ma’lumotlariga ko‘ra, sobiq prezident xavfsizlik xizmatining sobiq rahbari Giasint Kafando bilan birga sirtdan ayblangan, u ham umrbod qamoq jazosiga hukm qilingan.
“O‘tgan yilning oktabrida boshlangan tribunal ushbu shaxslarni davlat xavfsizligiga tajovuz qilish, qotillikka sheriklik va murdani yashirishda aybdor deb topdi”, — deyiladi xabarda.
“Odamlar boshqa odamlarni o‘ldirib, mamlakat taraqqiyoti jarayonini to‘xtatib, jazosiz qolishi yaxshi emas”, — degan Sankaraning bevasi Mariam.
Tom Sankara Burkina-Fasoning hurmatli rahbari va panafrika harakati tarafdori bo‘lgan. “Afrikalik Che Gevara” nomini olgan siyosatchi mamlakatda qashshoqlikni qisqartirish yo‘lida keng ko‘lamli islohotlarni o‘tkazish uchun 1983-yilda yaqin do‘sti Kompaore bilan hokimiyatni egallagan.
U mamlakat nomini Burkina-Fasoga o‘zgartirgan va hashamatli xizmat avtomobillarini ancha arzonlariga almashtirgan. Uning rejimi ayollarning imkoniyatlarini kengaytirish, oziq-ovqat mahsulotlarini ishlab chiqarish va atrof-muhit siyosatiga ustuvor ahamiyat bergan. 1987-yilda 37 yoshli Sankara 12 kishi bilan birga otib ketilgan. Shundan so‘ng Kompaore mamlakatda hokimiyat tepasiga kelib, uni 27 yil davomida boshqargan.
Izoh (0)