Андижондаги мактабда ўқитувчи ўқувчи қизни калтаклагани, ўқувчи қиз эса ўзини ҳимоялаш учун ўқитувчига қаршилик кўрсатаётгани акс этган видео тарқалди. Видеодаги ҳолат Асака туманидаги 38-умумий ўрта таълим мактабининг 10-А синф ўқувчилари билан юз бергани маълум бўлгач, «Дарё» мухбири ҳолатни ўрганиш мақсадида мазкур мактабда бўлди.
10-синф ўқувчиси Самандар Бурхоновнинг айтишича, ўтган жума, 1 апрель куни охирги дарсни синф раҳбари ўтиши керак бўлган. Бироқ ўқитувчи мактаб филиалидан дарс ўтиб қайтгунча ўқувчиларнинг аксарияти уйига кетиб қолган. Унинг эртасига эса ўқитувчи ҳеч ким унинг гапига кирмаётганидан хафа бўлиб, кетиб юборган ўқувчилар билан суҳбатлашган.
«Жума куни олтинчи соатдаги дарсимизда хонада беш нафар ўқувчи қолган эди. Устозимиз ҳеч кимни тўплай олмади ва раҳбариятдан ўқувчилар кетиб қолгани учун гап эшитди. Шундан кейин ўқитувчимиз анча асабийлашди, кетиб қолганларни рўйхатга олиб, улар билан эртага гаплашишини айтди. ‘Ҳеч ким менинг гапимга кирмайди’, дея хафа бўлиб, йиғлади ҳам. Эртасига дарсдан кетиб юборганлар билан гаплашибди. Уларнинг нега кетиб қолганини сўраб, уч кишини қаттиқ урибди ҳам. Мен кеч қолганим учун буни синфдошларимдан эшитдим.
Калтак еганлар ичида амакимнинг қизи ҳам бор экан. Устозимиз қизни урганда унинг боши деворга қаттиқ тегган экан. Уйига борганда дори ичган, аммо оғриқ қолмагач тез ёрдам чақирган. Шунда онасига воқеани айтиб берган. Қизнинг онаси — келинойим Дилбар опа билан гаплашиш учун мактабга келди. Келинойим устозимиз билан тортишаётган пайтда ажратиб, олиб чиқиб кетдим. Дилбар опа душанба куни ҳам қочиб кетиб, шанба куни келмаганларнинг бир нечтасини урган. Бир синфдошимиз эса бу ҳолатни видеога олган. Қандай қилиб тарқалганини эса билмаймиз», — дейди Самандар Бурхонов.
Ўқувчилардан бири Ўринбой Баҳодиржонов видеони телефони орқали профилактика инспекторига бериш учун ёзиб олганини, аммо тарқатмаганини билдирди.
«Ўша куни ўқитувчимиз мени ҳам уриши мумкин эди. Лекин мен устозга бўйсунмадим, чақирганида чиқмадим. Чиққанимда урган бўларди. Шундан кейин бешта қизни урди. Хонада шовқин кўтарилиб кетди. Кимдир телефони борлар видеога олинглар, ‘участкавой’га берамиз, деди. Тўғриси, менда телефон бор эди, 10 секунд видеога олдим. У телефонимда турган эди. Видеони эрталаб ўқитувчиларда кўрдим. Лекин қаердан чиқиб кетганини билмайман. Фақат бир кишига ташлагандим. Тарқатмадим, тарқатганларни топсак, яхши бўларди», — дейди Ўринбой Баҳодиржонов.
Ўқувчи қизлардан бири Диёра Нуриддинованинг айтишича, у ўқувчилар орасида энг кўп калтак еганлардан.
«Бу воқеа жума куни бўлган. Дилбар опа дарсга кеч қолди. Мен эса курсга кеч қолаётган эдим. Рухсат сўраш учун устозни қидириб тополмадим. Қарасам, ҳамма кетаётган экан. Мен ҳам кетдим. Шанба куни келсак, Дилбар опа сизларнинг устингиздан директорга ёзиб юборибди, кириб ҳаммангизни урар экан дейишди. Кейин эса устозимиз кириб, дарсдан кетиб қолганларни бир қатор қилиб қўйди. Аввалига мен фақат сўкса керак деб ўйладим. Биринчида турганим учун олдимга келиб менга қўл кўтарди. Сочларим ҳам тўзғиб кетди. ‘Нега уряпсиз?’, деб сўрасам, ‘гап қайтарма’, деб ёмон сўзлар билан ҳақоратлади. ‘Нега ҳақоратлайсиз?’, деб сўрасам ҳам, уришда давом этди.
Ўша куни энг кўп мени урди ва ота-онамни чақириб келишимни айтди. Майли, қочинг, дадамни чақираман десам орқага итариб юборди, бошим деворга тегди. Шу пайт ‘замдиректор’имиз кириб, ‘Ҳеч киминг ота-онангни аралаштирма, шу ердаги гап шу ерда қолсин’, деди. Шундан кейин ҳеч кимга индамадим. Лекин ота-онам бундан ўртоқларим орқали хабар топиб мактабга келди. Устоз билан гаплашди. Энди бу ҳолат бошқа қайтарилмаса керак, деб ўйлагандим. Аммо душанба куни ўқитувчимиз яна бошқа ўқувчиларни урибди», — дейди Диёрахон Нуриддинова.
Мадина Муҳаммаджонованинг таъкидлашича, у синф раҳбари урганидан жаҳли чиқиб, ўзини ҳимоя қилиш мақсадида унинг қўлини қайтарган, аммо урмаган.
«Охирги соатдаги дарсга ўқитувчи кеч қолаётгани учун кетиб қолдик. Эртаси куни маълум сабабларга кўра, дарсга келолмадим. Душанба куни келганимда жума куни дарсдан кетиб қолган ва шанба куни келмаган қизларни доска олдида сафлашди. Бошимга қаттиқ уриб юборгани учун жаҳлим чиқиб, ўзимни ҳимоя қилиш учун қўлини қайтардим. Гап қайтардим. Лекин устозни урмадим ҳам, итармадим ҳам», — дейди Мадина Муҳаммаджонова.
Ўқитувчи Дилбар Раҳимова 30 йилдан буён ушбу мактабда болаларга таълим-тарбия бериб келади, ушбу синфга тўрт йилдан буён раҳбарлик қилмоқда. Унинг айтишича, сўнгги пайтларда ўқувчиларнинг хулқида ўзгаришлар пайдо бўлиб, ҳеч қандай рухсатсиз дарслардан кетиб қоладиган, ҳаттоки келмайдиган одат чиқарган. Натижада давомат пасайиб кетган. Оқибатда мактаб маъмурияти ўтказган йиғилишларда доимий гап эшитиб келган.
«Охирги пайтларда ўқувчилар мендан берухсат дарсдан кетиб қоладиган, ҳатто умуман келмай қўядиган бўлиб қолди. Давомат пасайиб кетди. Ҳар қандай ўқитувчининг бу ҳолатни кўргач, виждони қийналади-ку. Мен буларга яхши гапириб ҳам, ёмон гапириб ҳам кўрдим. Ҳамма усулдан фойдаландим, аммо таъсир қилмади. Охири шу даражагача келишга мажбур бўлдим. Ўша куни маънавият соатида дарсни жуда чиройли бошладим. Ўқувчиларни бепарво бўлмасликка чақирдим. Дўстона гаплашдик. Ҳаммаси хурсанд бўлиб мени тўғри тушунди. Лекин бешинчи соатдаги дарсимга кирсам, ўқувчилар йўқ. Қанчалик асабийлашганимни айтиб беролмайман ҳам. Кейин ўтириб, директор номига билдирги ёздим. Унда дарсларга келмайдиган ва ўша куни дарсдан қочиб кетган ўқувчилар исм-фамилиялари ёзилган эди. Ўша куни мен шундай қилмасам ҳам бўларди. Лекин улар кейин ҳам дарсдан қочаверарди. Биламан, бундай жазолашим тўғри эмасди.
Аввал бир неча марта тушунтириш хати олганман, ота-оналарига айтганман, ҳатто бу бўйича профилактика инспектори ҳам шуғулланган. Ҳеч бирининг фойдаси бўлмади. Фан ўқитувчилари ҳам бу синфдан норози. Кимнингдир китоби йўқ, кимдир ўқимайди, бошқаси умуман келмайди. Мен ҳам бирданига уриб-сўкиб кетмадим. Болаларнинг ўқишга лоқайдлиги сабаб қуюшқондан чиқишга мажбур бўлдим. Тўғриси, ўқув йили бошида бу синфни топшириб юбормоқчи бўлгандим. Ҳеч бир ўқитувчи бу синфга раҳбарлик қилишни хоҳламади. Мендан олдин тўрт марта синф раҳбар алмашган экан. Шундай бўлса ҳам, кимдир жарга ўзини ташлаш керак эди. Ўша жарга бугун мен йиқилдим», — дейди Дилбар Раҳимова.
Мактаб директори Фароҳиддин Мирзаевнинг айтишича, ушбу ҳолатнинг рўй беришида икки томоннинг ҳам айби бор. Ҳолат мактаб педагогик кенгаши томонидан кўриб чиқилиб, ўқитувчига интизомий чора кўрилиши мумкин.
«Бу салбий ҳолат рўй беришида икки томоннинг ҳам айби бор. Дилбархон анча тажрибали, малака тоифасига эга устозлардан бўлиб, 30 йилдан буён биология фанидан дарс бериб келади. Ушбу синфга келадиган бўлсак, болалар ўтиш ёшида. Тарбиясида ҳам бироз камчилик бор. Бу бўйича бир неча марта ота-оналари билан гаплашганмиз, ҳамкорликда ишлашни таклиф қилганмиз. Хуллас, ўша куни ўқувчилар дарсдан қочиб кетишган. Мен доим ўқитувчилардан давоматни талаб қилганим учун бу ҳолатдан устознинг жаҳли чиққан. Лекин ўқувчиларга қўл кўтаргани ҳам тўғри иш эмас. Биз бунга алоҳида интизомий чора кўрамиз. Зудлик билан навбатдан ташқари педагогик кенгаш чақирамиз ва бу ҳолатни муҳокамага қўйиб ўрганамиз. Якуний хулоса бўйича маълумотлар берилади», — дейди Фароҳиддин Мирзаев.
Ўрганиш давомида «Дарё» мухбири мактабга йиғилган ота-оналар билан ҳам суҳбатлашди. Ота-оналар ўқитувчидан норози эмаслигини, фарзандлари учун ўқитувчиси қайғуришини айтиб, бу масалалар мактабнинг ўзида ҳал бўлиши кераклигини билдирган.
Изоҳ (0)