АҚШ давлат котиби Энтони Блинкен Арманистон бош вазири Никол Пашинян ҳамда Озарбайжон президенти Илҳом Алиев билан телефон орқали мулоқот қилиб, минтақадаги кескинликни пасайтириш зарурлигини маълум қилди, деб хабар беради Давлат департаменти.
АҚШ давлат котиби икки мамлакат етакчисини вазминлик кўрсатишга ва дипломатияни қайта тиклашга чақирган. Унинг сўзларига кўра, ҳозир ҳарбий ҳаракатларни кўпайтириш вақти эмас.
Шунингдек, Блинкен Арманистон ва Озарбайжон ўртасидаги тинчлик музокараларини, жумладан, Алиев ва Пашинян ўртасида 6 апрель куни Европа кенгаши раҳбари Шарль Мишель билан ўтказилиши режалаштирилган учрашувни қўллаб-қувватлашини билдирган.
26 март куни Россия Мудофаа вазирлиги Озарбайжон қуролли кучлари Тоғли Қорабоғда «Россия тинчликпарвар миссияси жавобгар бўлган зонага» кирганини ва тан олинмаган республика армиясининг бўлинмасига ҳужум қилганини маълум қилганди.
Боку кескинлик «Озарбайжоннинг Россияни тинчликпарвар контингенти вақтинча жойлаштирилган ҳудудида» содир бўлганини айтган. Шунингдек, Россиядан «Тоғли Қорабоғ» иборасини ишлатмасликни ва Озарбайжон ҳудудини номини тўғри кўрсатишни» сўраган.
2020 йил сентябрь ойи охирида Тоғли Қорабоғда кўп йиллар давомида биринчи марта кенг кўламли ҳарбий ҳаракатлар бошланганди. Улар бир ярим ой давом этди; 10 ноябрь куни томонлар Россия воситачилигида ўт очишни тўхтатиш тўғрисида келишувга эришди. Жанглар натижасида Арманистон Тоғли Қорабоғ республикасининг қарийб ярмини Озарбайжонга қайтарди. Россия Тоғли Қорабоғга тинчликпарвар контингентини юборди.
Мавзуга доир: Тоғли Қорабоғ ҳукумати ҳарбий ҳолат эълон қилди
Изоҳ (0)