Илон Маск Twitter’нинг энг йирик акциядори бўлди

Илон Маск Twitter компаниясининг 9,2 фоиз улушини қарийб 3 млрд долларга сотиб олди. Бу ҳақда Bloomberg хабар бермоқда.

Душанба куни меъёрий ҳужжатларда Маскнинг хариди маълум бўлганидан кейин Twitter акциялари тахминан 26 фоизга ошди. Акциялар Илон Маск учун 2,89 млн долларга тушган.

Маск ўтган ой Twitter’да ўзининг 80 миллиондан ортиқ обуначилари орасида сўров ўтказиб, компания сўз эркинлиги тамойилларига амал қиладими ёки йўқлигини сўраган эди. 70 фоиздан ортиқ фойдаланувчилар «йўқ» деб жавоб берганидан сўнг, у ўз платформасини яратиш ҳақида жиддий ўйлаётганини айтди.

Маск Twitter’даги энг фаол шахслардан бири ва мунтазам равишда платформадаги муаммоларни танқид қилиб келади.

Маскнинг бу ҳаракати Twitter’нинг янги бош директори Параг Агравал учун яна бир катта синов бўлади, у ноябрь ойида кутилмаганда истеъфога чиққан Жек Дорсининг ўрнига келган эди. Агравал масъулиятни оширишга, қарорларни тезроқ қабул қилишга ва маҳсулот ижросини яхшилашга ваъда берди. 

Компания ўсиш бўйича улкан мақсадларни қўйди, шу жумладан, йиллик даромадни 7,5 млрд долларга ошириш ва 2023 йил охиригача кунлик фойдаланувчиларни 315 миллионга етказиш режалаштирилган.

Bloomberg Billionaires Index маълумотларига кўра, дунёнинг энг бой одами бўлган Маск душанба куни бўлиб ўтган дастлабки савдоларда Twitter акцияларининг ўсиши ҳисобига, март ойининг ўрталаридан бери қарийб 1,1 млрд доллар ишлаб олди.

Таҳлилчиларнинг фикрича, Twitter йиллар давомида барқарор ўсиб бораётган бўлса-да, унинг акциялари ўсиши саноатдаги рақобатдошларидан орқада қолмоқда.

Аввалроқ Илон Маск дунёдаги биринчи триллионерга айланиши мумкинлиги ҳақида хабар берилган эди.