The New York Times газетаси Россия армияси чиқиб кетганидан сўнг кўчаларидан ўнлаб тинч аҳоли жасади топилган Буча шаҳрининг сунъий йўлдошдан олинган тасвирларини эълон қилди.
Журналистлар Maxar Technologies томонидан март ойи ўрталарида олинган суратларни таҳлил қилиб, аҳоли уч ҳафтадан кўпроқ вақт олдин — шаҳар ҳали Россия ҳарбийлари назоратида бўлган пайтда ўлдирилган, деган хулосага келди.
9 дан 11 мартгача бўлган вақт оралиғида шаҳарнинг Яблонская кўчасидаги тасвирларда инсон танасининг ўлчамидаги камида 11 та қора объект пайдо бўлган ва у ерда уч ҳафта ётган. Уларнинг жойлашуви 2 апрель куни Украина ҳарбийлари томонидан олинган видеодаги одамларнинг жасадлари ётган жойлар билан тўлиқ мос тушди.
Журналистлар Яблонскаядан олинган ва уч кишининг жасади акс этган яна бир видеони сунъий йўлдош тасвирлари билан солиштириб, жасадлар кўчада 20—21 март кунлари пайдо бўлганини аниқлади.
Эслатиб ўтамиз, Киев вилоятидаги Буча шаҳрида тинч аҳолининг қирғин қилингани 2 апрель куни, Россия ҳарбийлари чиқиб кетганидан кейин Украина армияси шаҳар устидан назорат ўрнатган пайтда маълум бўлди. Украина президенти маҳаллий аҳолининг ўлимида россиялик аскарларни айблади. Россия Мудофаа вазирлиги ҳалок бўлганларнинг видео ва суратларини «провокация» ва «Ғарб оммавий ахборот воситалари учун Киев режимининг томошаси» деб атади. Вазирлик маълумотларига кўра, рус ҳарбийлари 30 март куни шаҳарни тарк этгунга қадар Буча шаҳридаги бирорта ҳам маҳаллий аҳоли «ҳеч қандай зўравонлик ҳаракатларидан жабр кўрмаган».
Изоҳ (0)