Ливан бош вазири ўринбосари Саад ал-Шами Ливан давлати ва марказий банки банкрот бўлганини эълон қилди, деб ёзмоқда Reuters.
Сиёсатчи давлат молия секторининг йўқотишларини енгиб ўтишга қодир эмаслигини, яъни унинг ликвидлиги йўқлигини маълум қилган.
«Афсуски, давлат ҳам, марказий банк ҳам банкрот бўлди, шунинг учун бизда муаммолар бор... чиқимлар қилиб бўлинган», — деди бош вазир ўринбосари маҳаллий ОТВ телеканалига берган интервьюсида.
Унга кўра, чиқимлар давлат, Ливан банки, банклар ва омонатчилар ўртасида тақсимланади. Иқтисодиётдаги муаммолар ўнлаб йиллар давомида тўпланиб келган, дея таъкидлади расмий.
«Бир фактни инкор қилиб бўлмайди... биз фуқаролар учун ҳисобварақларидан пул ечиш имконини оча олмаймиз, чунки нормал ҳолатда шундай қилса бўларди », — деди ал-Шами.
Айни пайтда Ливан марказий банки раҳбари Риад Саламе бош вазир ўринбосарининг баёнотини рад этиб, молия секторидаги йўқотишларга қарамай, банк ўзининг қонуний ролини бажаришда давом этаётганини айтди.
«Марказий банкнинг банкротлиги ҳақидаги тарқалган маълумотлар ҳақиқатга тўғри келмайди», — деди у.
Саламенинг қўшимча қилишича, банк пул ва кредит тўғрисидаги қонуннинг 70-моддаси бўйича ўзининг қонун ҳужжатларида белгиланган мажбуриятларини бажаришда давом этмоқда, ушбу моддада банкка Ливан валютасининг яхлитлигини сақлаш ва иқтисодий барқарорликни сақлаш вазифаси юклатилган.
Жаҳон банки ҳисоб-китобларига кўра, Ливан иқтисодиёти 2019—2021 йиллар оралиғида қарийб 60 фоизга қисқарди, бу ҳозирги даврдаги энг ёмон молиявий инқирозлардан биридир. Бундан ташқари, Ливан лираси ўз қийматининг 90 фоиздан ортиғини йўқотди. Банклар норасмий капитал назоратини ўрнатди, бу эса одамларни ўз жамғармаларига кириш ҳуқуқидан маҳрум қилди.
Эслатиб ўтамиз, Ливан ҳукумати 2020 йилдаёқ мамлакатни банкрот деб эълон қилган. Бу мамлакатда норозилик намойишлари бошланиб, эски ҳукумат истеъфога чиқишга мажбур бўлганидан кейин юз берди. Бундан ташқари, Байрут портидаги портлаш ҳам вазиятга таъсирини кўрсатди.
Изоҳ (0)