Ўзбекистонда маиший техникаларни мажбурий маркировкалаш 15 апрелдан бошланади

Вазирлар Маҳкамаси 2 апрель куни «Маиший техника маҳсулотларини мажбурий рақамли маркировкалаш тизимини жорий этиш тўғрисида»ги қарорни тасдиқлади.

Эслатиб ўтамиз, 2020 йилда маҳсулотларни маркировкалаш ва кузатиб бориш бўйича «Асл белгиси» миллий ахборот тизими ишга туширилган эди. Ушбу тизим оператори сифатида Россиянинг «Истиқболли технологияларни ривожлантириш маркази» асос солган CRPT Turon компанияси танланган.

Мажбурий маркировкаланиши лозим бўлган маҳсулотлар рўйхатидан тамаки маҳсулотлари, алкоголли ичимликлар (пиводан ташқари), пиво маҳсулотлари, дори воситалари ва тиббиёт воситалари, сув ва алкоголсиз ичимликлар, маиший техникалар ўрин олган.

Вазирлар Маҳкамаси қарори билан мажбурий рақамли маркировкалашни бошлаш муддатлари ва маҳсулотлар турлари гуруҳлар бўйича қуйидагича белгиланди:

• биринчи гуруҳ — чангютгич, кир ювиш машинаси, совиткич ва музлаткич, телевизор ва монитор — 2022 йил 15 апрелдан бошлаб;
• иккинчи гуруҳ — маиший газ плитаси, ошхона дудбурони, духовка ва печка, микротўлқинли печ, дазмол, сув иситкич — 2022 йил 1 августдан бошлаб;
• учинчи гуруҳ — сув иситиш қозонлари, кондиционер, ўрнатилган электр моторли маиший техника (шарбат чиқаргич, блендер, миксер, қаҳва янчгич, гўшт майдалагич), барча турдаги лампалар — 2022 йил 1 ноябрдан бошлаб.

• мажбурий рақамли маркировкаланадиган маиший техника маҳсулотларининг идентификация кодлари рўйхати;
• ишлаб чиқарувчи ташкилотлар томонидан маиший техника маҳсулотларини мажбурий рақамли маркировкалаш тизимини босқичма- босқич жорий қилиш графиги;
• импорт қилувчи ташкилотлар томонидан маиший техника маҳсулотларини мажбурий рақамли маркировкалаш тизимини босқичма- босқич жорий қилиш графиги;
• улгуржи ва чакана савдо ташкилотларининг маиший техника маҳсулотларини мажбурий рақамли маркировкалаш тизимига босқичма- босқич ўтиши графиги;
• Маиший техника маҳсулотларини идентификация воситалари орқали рақамли маркировкалаш хусусиятлари тўғрисидаги низом.

Маълумот учун, CRPT Turon компаниясини яратган Россиянинг «Истиқболли технологияларни ривожлантириш маркази» компаниясининг 50 фоизи Алишер Усмоновнинг USM Holdings’га тегишли.