Статистика қўмитасига кўра, 2017 йили Тошкент шаҳрига расман 24 минг киши кўчиб келган. Бу сон ошиб бориб, 2021 йилда 111 мингга етган. Сўнгги 5 йилда жами 272 мингга яқин киши бошқа ҳудудлардан доимий яшаш учун пойтахтга кўчиб келган.
Шаҳарга келувчиларнинг сони тобора ортишига сабаби нима? Нега одамлар Тошкентга интилади? «Дарё» бу борада аҳоли фикри билан қизиқди.
Сўровномада иштирок этганларнинг деярли кўпчилиги пойтахтга ишлаш учун келганини айтди.
«Одамлар қаерда шароит бўлса, яхши яшаш учун ўша ерга интилади» — дейди сотувчи йигит.
«Вилоятда яшаш қийин. Газ, чироқ йўқ. Агар Тошкентникидек шароит қилинса, ҳар ким ўз вилоятида яшарди, ишларди»— дея таъкидлайди йўловчи аёл.
Талаба йигитнинг айтишича, бошқа ҳудудларга қараганда Тошкент ривожланган шаҳар ва саёҳат учун чиройли жойлари бор.
«Тошкентда бемалол ишлаб, пул топса бўлади. Бу ерда меҳнатингиз қадрланади, кўпроқ пул топасиз. Шу сабаб пойтахтда ишлаб юрибмиз» — дейди Сурхондарё вилоятидан ишлаш учун келган аёл.
Изоҳ (0)