O‘zbekiston MDHda birinchi bo‘lib pivoning majburiy markirovkasini joriy etdi

O‘zbekiston MDH hududida pivo mahsulotlarini majburiy raqamli markalashni boshlagan birinchi va yagona mamlakat bo‘ldi, deya xabar qilmoqda Davlat soliq qo‘mitasi matbuot xizmati.

Tamaki va alkogolli ichimliklar, shu jumladan, pivo mahsulotlarini raqamli yorliqlash tizimini bosqichma-bosqich joriy etish CRPT Turon kompaniyasi bilan hamkorlikda amalga oshirilmoqda.

Tizimni tatbiq etish doirasida “Asl belgisi” nomli milliy axborot tizimi ishga tushirildi va 2021-yil 1-yanvardan tamaki va alkogolli mahsulotlarning majburiy raqamli markirovkasi boshlandi. 1-aprel holatiga ko‘ra, tizimda alkogol va tamaki mahsulotlari tarmog‘ining 7800 dan ortiq ishtirokchilari ro‘yxatdan o‘tkazildi.

Xuddi shu hukumat qarori bilan Davlat soliq qo‘mitasi zimmasiga 2021-yil 1-apreldan boshlab yorliqli pivo mahsulotlari ishlab chiqarishni yo‘lga qo‘yishni ta’minlash vazifasi qo‘yildi. Shu kuni mamlakatning uchta eng yirik pivo zavodlarida (bozorning 76,9 foizi) yorliqli mahsulotlar ishlab chiqarish yo‘lga qo‘yildi, deyiladi xabarda.

Ta’kidlanishicha, Rossiyada pivo mahsulotlarini markalash 1-aprelda boshlangan va u 31-avgustgacha davom etadigan eksperiment bosqichida. “RBK” ma’lumotlariga ko‘ra, yorliqli mahsulotlarni tayyorlashning o‘rtacha vaqti to‘rt oydan to‘qqiz oygacha davom etadi, uning amalga joriy etilishi sentabr oyidan oldin boshlanmaydi.

Bundan avval O‘zbekistonda spirtli ichimliklar uchun minimal narxlar 20-martdan ko‘tarilgandi.