Шавкат Мирзиёев раислигида 5 апрель куни ўтказилган халқ таълими соҳасига доир йиғилишда мактаб директорларига нисбатан талаб кескин кучайтирилиши таъкидланди. Бу ҳақда президент матбуот котиби хабар қилди.
«Қайси мактаб директори ҳаракат қилаётган бўлса, натижа бўляпти. Аксинча, шароит яхши бўла туриб, ўзгариш қила олмаётган директорлар ҳам кўп», — дейди президент.
Шу боис Халқ таълими вазирлигига 1 сентябрдан бошлаб мактаб директорларини сертификатлаш тизимини жорий этиш топширилган. Бундан буён директорликка номзодлар ушбу тизим орқали танланади. Жойлардаги ҳақиқий ҳолатни ўрганиш асосида 193 та таълим муассасаси негизида табиий ва аниқ фанларга ихтисослашган мактабларни ташкил этиш таклифлари ишлаб чиқилган.
Вилоят, шаҳар ва туман ҳокимлари 1 августга қадар ўз ҳудудидаги ушбу мактабларни таъмирлаш, замонавий жиҳозлаш, яшаш ва овқатланиш учун шароитлар яратишга масъул этиб белгиланган.
«Янги ўқув йилига қадар 173 та мактаб тайёр бўлиши шарт ва бунга вилоят, шаҳар ва туман ҳокимлари жавобгар. Қолган 20 та ихтисослашган мактаб кейинги ўқув йилига қадар топширилиши шарт», — дейди президент.
Изоҳ (0)