Қозоғистонда контрразведка ходимлари президент Қосим-Жўмарт Тўқаевга суиқасд уюштиришни режалаштирган «хорижий разведка агенти»ни қўлга олди, деб хабар бермоқда мамлакат Миллий хавфсизлик қўмитаси (КНБ).
«Хорижий разведка агенти» 25 март куни Нур-Султонда ҳибсга олинган, КНБ уни «агент «А» деб атамоқда.
Қўмита маълумотларига кўра, президентга суиқасд уюштиришдан ташқари, у махсус ва ҳуқуқ-тартибот органлар ходимларига қарши терактлар уюштириб, айрим юқори мартабали давлат хизматчиларига суиқасд қилишни режалаштирган.
Қўлга олинган шахс, шунингдек, «Қозоғистон Республикасида Россияга қарши тарғиботни ёйиш ва ижтимоий тармоқларда тегишли материалларни чоп этиш орқали жамиятда русофоб қарашларни шакллантириш бўйича топшириқлар олган», — дейилади КНБ хабарида.
Тинтув чоғида «агент А»дан снайпер милтиғи, гиёҳванд моддалар ва катта миқдордаги пул топилиб, мусодара қилинган. «Қозоғистонга қурол-яроқ қисмларга бўлиб профессионал ниқобланган ҳолда олиб келинган», — дея таъкидлади КНБ.
Ҳибсга олинган шахс «хорижий давлатнинг кўрсатмаси ва манфаатларини кўзлаб амалга оширган» қўмита санаб ўтган қилмишларига иқрор бўлди, дейилади хабарда. Қозоғистон Жиноят кодексининг 255-моддаси, 4-қисми (терроризм акти) ва 24-моддаси, 1-қисми (жиноят ва суиқасдга тайёргарлик) бўйича тергов ҳаракатлари олиб борилмоқда.
Ўтган ҳафта Тўқаев «кенг кўламли ислоҳотлар» ва «янги Қозоғистон қурилиши»ни ваъда қилганди. У январь ойи бошида республикада газ нархи ошиши фонида бўлиб ўтган, бироқ кейинчалик ҳукуматга қарши намойишларга айланиб кетган оммавий намойишларни эслатди. Тўқаев ўшанда республикада сиёсий ислоҳотлар ўтказишга ваъда берганди.
Март ойи ўрталарида у Қозоғистон суперпрезидентлик бошқарув шаклидан кучли парламентга эга президентлик республикасига ўтиши кераклигини ҳам айтган. «Бундай тизим ҳокимият институтларининг оптимал мувозанатини таъминлайди ва мамлакатнинг барқарор ривожланишига хизмат қилади», — дея тушунтирган у.
Изоҳ (0)