Qozog‘istonda kontrrazvedka xodimlari prezident Qosim-Jo‘mart To‘qayevga suiqasd uyushtirishni rejalashtirgan “xorijiy razvedka agenti”ni qo‘lga oldi, deb xabar bermoqda mamlakat Milliy xavfsizlik qo‘mitasi (KNB).
“Xorijiy razvedka agenti” 25-mart kuni Nur-Sultonda hibsga olingan, KNB uni “agent “A” deb atamoqda.
Qo‘mita ma’lumotlariga ko‘ra, prezidentga suiqasd uyushtirishdan tashqari, u maxsus va huquq-tartibot organlar xodimlariga qarshi teraktlar uyushtirib, ayrim yuqori martabali davlat xizmatchilariga suiqasd qilishni rejalashtirgan.
Qo‘lga olingan shaxs, shuningdek, “Qozog‘iston Respublikasida Rossiyaga qarshi targ‘ibotni yoyish va ijtimoiy tarmoqlarda tegishli materiallarni chop etish orqali jamiyatda rusofob qarashlarni shakllantirish bo‘yicha topshiriqlar olgan”, — deyiladi KNB xabarida.
Tintuv chog‘ida “agent A”dan snayper miltig‘i, giyohvand moddalar va katta miqdordagi pul topilib, musodara qilingan. “Qozog‘istonga qurol-yaroq qismlarga bo‘lib professional niqoblangan holda olib kelingan”, — deya ta’kidladi KNB.
Hibsga olingan shaxs “xorijiy davlatning ko‘rsatmasi va manfaatlarini ko‘zlab amalga oshirgan” qo‘mita sanab o‘tgan qilmishlariga iqror bo‘ldi, deyiladi xabarda. Qozog‘iston Jinoyat kodeksining 255-moddasi, 4-qismi (terrorizm akti) va 24-moddasi, 1-qismi (jinoyat va suiqasdga tayyorgarlik) bo‘yicha tergov harakatlari olib borilmoqda.
O‘tgan hafta To‘qayev “keng ko‘lamli islohotlar” va “yangi Qozog‘iston qurilishi”ni va’da qilgandi. U yanvar oyi boshida respublikada gaz narxi oshishi fonida bo‘lib o‘tgan, biroq keyinchalik hukumatga qarshi namoyishlarga aylanib ketgan ommaviy namoyishlarni eslatdi. To‘qayev o‘shanda respublikada siyosiy islohotlar o‘tkazishga va’da bergandi.
Mart oyi o‘rtalarida u Qozog‘iston superprezidentlik boshqaruv shaklidan kuchli parlamentga ega prezidentlik respublikasiga o‘tishi kerakligini ham aytgan. “Bunday tizim hokimiyat institutlarining optimal muvozanatini ta’minlaydi va mamlakatning barqaror rivojlanishiga xizmat qiladi”, — deya tushuntirgan u.
Izoh (0)