Россияда камида 300 нафар суриялик ҳарбий хизматчи Украинага юборилишдан олдин тайёргарлик ўтамоқда. Бу ҳақда ўз манбасига таяниб, The New York Times хабар берди.
Гап Сурия уруши даврида россиялик ҳарбийлар билан ҳамкорлик қилган Сурия армияси бўлинмасининг аскарлари ҳақида кетмоқда.
Украинага юбориш учун Суриядаги ёлловчилар томонидан тузилган рўйхатларда аллақачон минглаб исмлар бор. Мақолада таъкидланишича, номзодлар юборилишидан олдин Сурия ва Россия махсус хизматлари томонидан текширилмоқда.
«Сўнгги йилларда Сурия ёлланма жангчи экспортчисига айланган — бу уруш оқибати бўлиб, кўплаб эркакларда жанговар тажриба мавжуд, бироқ мамлакат иқтисодиётига шу қадар путур етганида одамлар иш топа олмаяпти. Натижада улар Ливия, Озарбайжон, ЖАР ва эндиликда Украинадаги урушда ёлланма жангчи сифатида йўл олмоқда», — дейилади хабарда.
Россия Украинага суриялик ёлланма жангчиларни юборишни режалаштираётгани ҳақида март бошларида маълум бўлган. Россия ҳукумати ўз навбатида Яқин Шарқдан ДХР ва ЛХРга ёрдам беришни истаётган 16 минг кўнгилли борлигини маълум қилган.
Аввалроқ Суриянинг Deirezzor24 нашри Россия Сурияда ёлланма аскарларни, шунингдек, объектларни қўриқлаш учун одамларни ёллаётгани ҳақида хабар берганди. Қўриқлаш учун олти ойлик иш ва 200-300 доллар маош ваъда қилинган.
Россия—Украина урушига оид тезкор, ишончли янгиликлар ва маълумотларни «Дарё»нинг Live саҳифаси орқали кузатиб боринг → @Daryo_Live
Изоҳ (0)