Владимир Зеленский қасамёдни бузган ва «ватанини сотган» Украина хавфсизлик хизматининг (УХХ) икки нафар олий офицерини унвондан маҳрум қилиш бўйича қарор қабул қилди. Бу ҳақда Telegram’даги канали орқали маълум қилди.
«Икки нафар антиқаҳрамон бўйича қарор қабул қилинди. Ҳозирда барча хиёнаткорлар билан ишлашга вақтим йўқ, аммо айтишим мумкинки, аста-секин уларнинг барчаси жазоланади», — дейди у.
Давлат раҳбарининг сўзларига кўра, УХХ Ички хавфсизлик бош бошқармаси собиқ бошлиғи Андрей Наумов ҳамда УХХнинг Херсон вилояти бошқармасининг собиқ бошлиғи Сергей Криворучко унвонидан маҳрум этилган.
«Strana.ua» маълумотларига кўра, Зеленский Наумовни 2021 йилнинг июлида контрабанда схемаларидаги иштирокида гумонлаб, ишдан бўшатган. Россия томонидан махсус операция бошланишидан олдин Наумов хорижга чиқиб кетган.
Россия президенти Владимир Путин 24 февраль куни Украинада «денасификация ва демилитаризация» мақсадида ҳарбий операция бошланганини эълон қилди. Киев Москва билан дипломатик муносабатларни узди ва ҳарбий ҳолат жорий қилди.
20 март куни Украина Миллий хавфсизлик ва мудофаа кенгаши Россия билан алоқаси бўлган сиёсий партияларнинг ҳар қандай фаолиятини ҳарбий ҳолат даврида тўхтатишга қарор қилди. «Сиёсатчиларнинг бўлиниш ёки коллаборацияга қаратилган ҳар қандай фаолияти муваффақиятли бўлмайди, аксинча кескин жавоб олади. Ҳар бир инсон давлат манфаатлари, Украина манфаатлари ҳақида қайғуриши керак. Чунки бу ўзимиз учун, ҳаёт учун», — деди Владимир Зеленский.
Кейинроқ Зеленский ҳарбий ёки фавқулодда ҳолат вақтида қуролланиш ва ҳарбий хизматчиларнинг кўчирилиши бўйича маълумотларни ошкор этган шахсларга нисбатан жиноий жавобгарликни жорий этди. Қонунга кўра, қуроллар, ҳарбий хизматчилар ва ўқ-дориларнинг кўчирилгани ҳақида маълумотни ошкор қилганлар 3—5 йилгача озодликдан маҳрум этилиши мумкин.
Россия—Украина урушига оид тезкор, ишончли янгиликлар ва маълумотларни «Дарё»нинг Live саҳифаси орқали кузатиб боринг → @Daryo_Live
Мавзуга доир:
Изоҳ (0)