Destatis Федерал статистика бошқармасининг дастлабки маълумотларига кўра, Германия истеъмол нархлари 7,3 фоизга ошган. Бу 1990 йилдан бери охирги 30 йилдаги энг юқори кўрсаткичдир. Жорий йилнинг февраль ойида истеъмол нархларининг ўсиши йиллик кўрсаткичда 5,1 фоизни ташкил этди.
Россиянинг Украинага бостириб кириши ортидан табиий газ ва нефть маҳсулотлари нархи яна сезиларли даражада ошди ва инфляциянинг юқори даражасига таъсир кўрсатди, — дейилади вазирлик баёнотида.Энергия таъминоти ва нархлар билан боғлиқ хавотирлар ҳам Германияни 2022 йил учун ўсиш прогнозини камайтиришга ундади. Федерал ҳукуматнинг мустақил иқтисодий маслаҳатчилари гуруҳи жорий йилда мамлакат ялпи ички маҳсулоти атиги 1,8 фоизга ўсишини башорат қилмоқда. Ноябрь ойида маслаҳат кенгаши 2022 йил учун 4,6 фоизга ўсишини прогноз қилди.
Европанинг энг йирик иқтисодиёти коронавирус пандемиясидан кейин эндигина тикланишни бошлаган эди.
Германияда инфляциянинг ўсиши кетма-кет бир неча йил кузатилмоқда. Ўтган йили мамлакатда инфляция деярли 29 йил ичида биринчи марта беш фоизлик чегарадан ошгани хабар қилинган эди. Бундан ташқари, Германияда рекорд миқдордаги компаниялар яқин уч ой ичида нархларни ошириш ниятида.
Аввалроқ Германия Қатар билан газ бўйича узоқ муддатли ҳамкорлик тўғрисида келишиб олгани хабар берилган эди.
Изоҳ (0)