Словакия Россиядан Братиславадаги элчихонада ишлайдиган ходимларни сонини 35 тага қисқартиришни талаб қилди. Бу ҳақда мамлакат Ташқи ишлар вазирлиги ахборотига асосланиб, Reuters хабар берган.
Словакия ташқи ишлар вазири мазкур қарорга россиялик дипломатлардан бирининг ноўрин фаолияти сабаб бўлганини маълум қилган. Бироқ Словакия ТИВ дипломатнинг қандай иш қилганига аниқлик киритмаган.
Словакия ОАВ Ташқи ишлар вазирлигининг талаби Россия элчихонасидаги ходимлар сонининг икки баравар қисқаришини англатиши ҳақида ёзган. Россия томони ушбу қарор юзасидан изоҳ бермаган.
Охирги бир неча ҳафта ичида турли мамлакатларда ўнлаб россиялик дипломатларга persona non grata мақоми берилган. 29 март куни Бельгия 21 нафар, Нидерландия 17 нафар, Ирландия 4 нафар дипломатни ўз ҳудудларидан чиқариб юборишини билдирган. Шунингдек, Польша ҳам 40 дан ортиқ россиялик дипломатни мамлакатдан чиқариб юборишини баён этган. Россия ҳукумати ушбу ҳаракатларга жавоб қайтаришни ваъда берган. Россия дипломатларни чиқариб юбораётган хориж дипломатик миссияларининг ходимларини тенг бараварига қисқартиришни мақсад қилган.
Россия—Украина урушига оид тезкор, ишончли янгиликлар ва маълумотларни «Дарё»нинг Live саҳифаси орқали кузатиб боринг → @Daryo_Live
Изоҳ (0)