Қонунчилик палатаси депутати Расул Кушербаев Соғлиқни сақлаш вазирининг буйруғига асосан тиббиёт ходимларига ҳижоб ва бошқа диний кийим-бошларда юриш бўйича тақиқ олиб ташлангани ҳақида хабар қилганди. ССВ ҳолатга муносабат билдирди.
Қайд этилишича, инсон саломатлигини муҳофаза қилиш ва мустаҳкамлаш тиббиёт тизимининг энг муҳим вазифаси бўлиб, ушбу соҳа эгалари ўз юриш-туриши, кийиниши ва мулоқот маданияти билан барчага ўрнак бўлиши, касбдошларига, қолаверса, беморларга ҳурмат ва меҳр-мурувват кўрсатиши лозим. Шу боисдан 2022 йил 24 мартда Соғлиқни сақлаш вазирининг Тиббиёт ходимларининг одоб-ахлоқ кодексини тасдиқлаш ҳақида буйруғи қабул қилинган.
Тиббиёт ходимлари ўз касбий мажбуриятларига риоя этишини таъминлаш мақсадида ишлаб чиқилган мазкур ҳужжатдаги вазифалар вазирлик тизимидаги барча корхона-ташкилотлар, олий ва ўрта-махсус таълим муассасаларида ижро этилиши қатъий белгиланган.
Хусусан, буйруқнинг «Муассаса ходимлари ва талабаларнинг муомаласи, кийиниш маданияти қоидалари» номли 3-бобида тиббиёт муассасасида фаолият кўрсатаётган ва таълим олаётган аёл ходим ва табалаларга алоҳида ва аниқ талаблар қўйилган.
Шунингдек, ушбу бобнинг 3.1.6 бандида аёл тиббиёт ходимлари ва талабалар оқ халат ва унга мос тоза ва махсус бош кийим кийиши, халат тиззадан пастда туриши, енги узун (фаслга қараб), классик услубда чет эл ва турли хил фирма ёрлиқларидан холи бўлиши аниқ ва батафсил баён этилган.
«Тиббиёт ходимларининг одоб-ахлоқ кодексида келтирилган ушбу мезонлардан кўриш мумкинки, тиббиёт муассасаларида шифокор ва ҳамшираларнинг иш фаолияти давомида белгиланган меъёрлар асосида кийиниши қатъий белгилаб қўйилган. Шундай экан, оммавий ахборот воситалари вакиллари ва блогерлардан ушбу буйруқ мазмун-моҳиятини нотўғри талқин қилмасликларини сўраймиз», — дейилади хабарда.
Эслатиб ўтамиз, 2021 йилнинг сентябридан бошлаб Ўзбекистонда ўқувчи қизларнинг мактабга рўмол ўраб келишига рухсат берилган.
Изоҳ (0)