Давлат-хусусий шериклик асосидаги мактабгача таълим ташкилотлари фаолиятини ташкил этиш бошқармаси бошлиғи Абдуғулом Ҳакимов 31 март куни АОКАда бўлиб ўтган матбуот анжуманида болаларни 2 ёшдан боғчага қабул қилиш ҳамда қамраб олиш жараёнлари ҳақида фикр билдирди. Бу ҳақда «Дарё» мухбири хабар бермоқда.
Президент фармони билан, тўлиқ қувват билан ишламаётган давлат мактабгача таълим ташкилотларига 2 ёшдан 3 ёшгача бўлган болаларни пуллик хизмат кўрсатиш шаклида қабул қилишга рухсат берилади.
«Тўлиқ қувватда ишламаётган боғчани қандай қилиб аниқлаймиз? Бизда болалар боғчаси тизими бор. Ушбу тизимда ҳар бир мактабгача таълим ташкилотининг қуввати белгиланади. Унда қанча бола қабул қилингани, уларнинг қанчаси бормаётгани ҳақида маълумот бор. Тўлиқ қувват билан ишламаётган деганда талабга ва санитария ҳолатига жавоб берадиган, жиҳозланган, 20 нафар болагача қабул қилиш имкони бўлган бўш хоналари бор давлат мактабгача таълим муассасалари ҳақида гап кетяпти. Хоҳлаган МТМда ҳам ушбу хизматни ташкил қилиб бўлмайди. Барча боғча инвентаризациядан ўтказилади, туман мактабгача таълим бўлими вазирлик билан келишади, бўш хоналарда болаларни қабул қилади», — дейди Абдуғулом Ҳакимов.
«Ҳали қамраб ололмаган қисми ҳам бор. Уларни имкон даражасида нодавлат МТМларга боришади. Ўта зич бўлган ҳудудларимиз бор. Масалан, Андижон вилоятида талаб кўп. Боғчанинг қувватига ҳам қараймиз. 7 ёшда болалар мактабга чиқаётганда бўшайдиган ўринларимиз кўп бўлса навбат келиш масаласи тезлашади. Лекин кичкина қувватда талаб юқори бўлса қийин бўлади. Шундай боғчаларимиз борки, ҳатто 300-350 нафаргача болалар навбатда туради», — дейди мактабгача таълим вазирлиги вакили Абдуғулом Ҳакимов.
Мактабгача таълим вазирлиги ахборот хизмати раҳбари Мавлуда Асқархўжаева ҳам болаларни боғчаларга қамрови тўғрисида гапирди.
«Демографик ўсиш деган нарса бор. Ўтган йилнинг ўзида 800 мингдан ортиқ бола туғилган. Мактабгача таълим вазирлиги ФХДЁлар билан биргаликда шундай тартиб ўрнатди – бола туғилганиданоқ боғчага навбатга қўйилади. Аввалги тарихга ҳам тўхталишимиз керак. 28 йил давомида бизда боғчалар сони камайиши бошланган, кўпайиш эмас. Аҳолимиз сони 33 миллионга чиққанида ҳам МТМларга урғу берилмаган. Сўнгги 5 йилда ушбу соҳа буткул ўзгарди. Яқин келажакда мактабгача таълим ривожлантириш концепциясида 2030 йилгача болалар қамровини 95 фоизга чиқаришимиз керак. Бу рақамлар бутун республика бўйича инобатга олиняпти. 2025 йилгача 6 ёшли болалар 100 фоиз қамраб олинади. Чунки улар мактабга тайёрлов гуруҳлари ҳисобланади.
Шунингдек, кўп ота-оналар ўзлари бирор боғчани танлаб, унга фарзандини навбатга қўйишади. Бу борада бизга ҳам мурожаатлар келади. Мисол учун, Юнусобод туманидаги 74-боғча бўйича мурожаатлар келади. Ҳозир у ердаги навбатда мингдан ошиб кетган. Ота-оналар ўзларига яқин боғчаларга фарзандларини бермай, «у ер сифатсиз» дейишади. Қаердан билишади? Шунинг учун ота-оналардан ҳам илтимос қилардик, ўзларига яқин боғчаларга фарзандларини берса. Бундан ташқари, ота-оналар 3 ёшда давлат хизматлари марказига фарзандини навбатга қўйса эртани ўзида боғчага чиқади, деб ўйлайди», — дейди у.
Изоҳ (0)