«Тўлов бўлмаса, газ ҳам йўқ». Песков Европанинг газни рублда сотиб олишдан бош тортиши ҳақида

Россия Европа Иттифоқи давлатлари газ учун ҳисоб-китобларни рублда амалга оширмаса, уни бепул етказиб бермайди. Бу ҳақда мамлакат президентининг матбуот котиби Дмитрий Песков PBS’га берган интервьюсида маълум қилди.

Песковнинг сўзларига кўра, у ҳозирча Брюссель рад жавобини берса, Москва қандай йўл тутишини билмайди, ҳукумат Европа Иттифоқининг якуний қарори бўйича мавжуд вариантларни кўриб чиқмоқда. «Бироқ бу борада Ғарбий Европага газни бепул жўнатиб, хайрия билан шуғулланиш ниятида эмасмиз», — дейди у.

«Тўлов йўқ — газ ҳам йўқ», — дея қўшимча қилади Песков.

Аввалроқ Россия президентининг матбуот котиби журналистлар билан суҳбатда газ етказиб бериш мураккаб жараён экани, «бу дўкондан бирор нима харид қилиш эмаслигини» таъкидлаган. «Бу ҳам етказиб бериш, ҳам тўлов, ҳам баланслашдир. Ҳозирда барча модалликлар идоралараро, ‘Газпром’ билан ишлаб чиқилмоқда, кейин эса аниқ вақт чегаралари белгиланади», — дейди Песков.

Брюссель Россияни Европа Иттифоқига энг йирик газ етказиб берувчи деб атайди — мамлакат иттифоқ давлатларининг 40 фоиз газини таъминлаб, нефть импортининг чорак қисмидан ортиғини ва кўмир етказиб беришнинг қарийб ярмини эгаллаган.

23 март куни Владимир Путин Россия газ борасидаги ҳисоб-китобларни рублда амалга оширишини маълум қилди. У ҳукумат, Марказий банк ва «Газпром»га ой охирига қадар тўлов валюталарини ўзгартириш бўйича ҳисобот тақдим этишни буюрган.

Европа давлатлари тўлов шартномада белгиланган валютада амалга оширилиши кераклигини таъкидламоқда. Европа Иттифоқи раҳбари Урсула фон дер Ляеннинг фикрича, газ учун тўловларни рублга ўтказиш — Россиянинг санкцияларни айланиб ўтишга бўлган уринишидир. «Катта еттилик» давлатлари Россия гази учун тўловни рублда тўлашни рад этган. «Тўловни рублда қилиш номақбул ҳаракат ва биз манфаатдор компанияларни Путиннинг ушбу талабларини бажармасликка чақирамиз», — дейди Германия иқтисодиёт вазири Роберт Хабек.