Бирлашган Миллатлар Ташкилоти украиналик қочоқлар ҳақидаги янгиланган маълумотларни тақдим этди.
БМТнинг инсон ҳуқуқлари бўйича Олий комиссари бошқармаси Twitter’даги саҳифасида 3,8 миллион одам 24 февралда уруш бошланганидан бери Украинадан чиқиб кетганини хабар қилган.
Бошқарма маълумотига кўра, 6,5 миллион украиналик мамлакат ичида бошқа ерга кўчиб ўтган. Камида 13 миллион одам ҳужумларга учраган ҳудудларда ёки хавф даражаси ошган, кўприклар, йўллар вайрон бўлган, шунингдек, ресурслар етишмайдиган жойларда қолиб кетган.
«Украина ичида фуқароларни эвакуация қилиш учун хавфсиз йўлаклар ташкил қилиш ва уларнинг ҳимояланиши кафолатлаш долзарб муаммо бўлиб қолмоқда. Гуманитар ёрдамни етказиб бериш эса хавфли ва қийин вазифага айланган», — деган БМТнинг қочоқлар масалалари бўйича Олий комиссари Филиппо Гранди.
У иккала томонни ҳам тинч аҳолини эвакуация қилиш учун хавфсиз йўлаклар билан таъминлашга, мамлакат миқёсида фуқароларга ижтимоий ёрдам кўрсатиш учун имконият яратишга чақирган.
Аввал БМТ жараённинг миқёси ва воқеалар ривожининг тезлигидан келиб чиқиб, Иккинчи жаҳон урушидан кейин кузатилган энг катта миграция инқирози бошланаётганини қайд этган. Қайд этилишича, хориждаги украиналик қочоқларнинг қарийб ярми болалар.
Шунингдек, АҚШнинг Украинадаги урушдан қочаётган 100 минг нафар қочқинни қабул қилишни режалаштираётгани ҳақида хабар берилган. Польша эса украиналиклар гривна банкноталарини поляк злотийларига конвертация қилиш мумкинлигини билдирган.
Россия—Украина урушига оид тезкор, ишончли янгиликлар ва маълумотларни «Дарё»нинг Live саҳифаси орқали кузатиб боринг → @Daryo_Live
Изоҳ (0)