Бразилия президенти Жаир Болсонару қорнидаги оғриқ туфайли шошилинч равишда шифохонага ётқизилди, деб хабар беради Reuters.
Жаир Болсонару қорнида юзага келган қаттиқ оғриқни текшириш учун мамлакат пойтахтидаги ҳарбий госпиталга етказилган.
«Унинг аҳволи яхши», — дейди алоқа вазири Фабио Фариа. Шу билан бирга, у «қорнидаги оғриқ» сабаб таҳлил намуналарини топшириш учун госпиталга олиб борилганини тасдиқлаган.
Маълум қилинишича, Болсонару бир кеча шифохонада кузатув остида қолади. Ҳозирча шифокорлар давлат раҳбарининг аҳволига ҳеч қандай изоҳ бермаган. Биринчи хоним Мишел Болсонару турмуш ўртоғи ўзини яхши ҳис қилаётганини билдирган.
2018 йилда сайловолди кампанияси пайтида Жаир Болсонаруга пичоқ билан ҳужум қилинган. У ошқозонидан яраланган, ичакларига зарар етган. Шундан сўнг Болсонару олтита операцияни бошдан ўтказган, уларнинг айримлари ҳужум билан боғлиқ бўлмаган. 2021 йилда эса Бразилия президенти 10 кундан ортиқ давом этган ҳиқичоқ туфайли касалхонага ётқизилганди.
Изоҳ (0)