«ПСЖ» футболчиси Килиан Мбаппе учун курашга «Барселона» ҳам қўшилди.
«Барселона» бундай даражадаги ўйинчини қўлга киритиш учун молиявий жиҳатдан рақобатлаша олишига ишончи комил ва Мбаппени жалб қила оладиган таклиф билан чиқишга тайёр. Каталонияликлар Goldman Sachs’дан олган 595 миллион евролик кредит ва янги ҳомий Spotify билан тузилган 70 миллион евролик шартнома эвазига энди Килиан трансферини амалга оширишга қодир.
Мбаппе учун курашда «Реал» фаворит. Аммо «кўк-анорранглилар» таклиф билан чиқса, французнинг вакиллари ушбу таклифни кўриб чиқиши мумкин. Ўз ўрнида «Барселона» Килиан қарор қабул қилишидан олдин бош мураббий Хави билан суҳбатлашиб олиши керак деб ҳисобламоқда.
Аввалроқ «ПСЖ» Мбаппега 50 миллион евро маош ва яна қўшимча 100 миллион евро бонус билан янги шартнома таклиф қилгани ҳақида хабар берилганди.
Бунгача Килиан «ПСЖ» тарихида энг яхши тўпурарга айланиш учун клубда қолиши мумкинлиги хабар қилинганди. Шунингдек, Франциянинг амалдаги ва собиқ президентлари ҳам Килиан Мбаппега «ПСЖ»да қолишни маслаҳат берганди.
Мбаппе 2017 йилдан буён «ПСЖ» шарафини ҳимоя қилиб келмоқда. Футболчининг парижликлар билан шартномаси 2022 йил июнь ойида ўз ниҳоясига етади. Жорий мавсум футболчи Франция чемпионатининг 26 ўйинида иштирок этиб, 15 та гол ва 10 та голли узатмага муаллифлик қилди.
Янада кўпроқ футбол ва спорт янгиликларидан бохабар бўлишни истасангиз, «Дарё»нинг Telegram’даги расмий спорт канали — @Daryo_Sport24’га обуна бўлинг!
Изоҳ (0)