24 март куни эрталаб Россия қўшинлари Харьков вилоятидаги Изюм шаҳрида тўлиқ назорат остига олди. Бу ҳақда Россия Мудофаа вазирлиги расмий вакили Игорь Конашенковга таяниб, «Интерфакс» хабар берди.
Идора, шунингдек, ўтган кеча Россия ҳарбийлари Украинанинг 60 та ҳарбий объектини, Киев яқинида 13 та ҳаво ҳужумидан мудофаа тизимини йўқ қилгани ва иккита учувчисиз бошқариладиган учиш аппарати уриб туширилганини маълум қилди. Уруш бошланганидан бери Россия Қуролли кучлари томонидан Украинанинг 257 та дрони, 202 та зенит ракета мажмуалари, 1572 та танки ва бошқа ҳарбий машиналари йўқ қилинган.
Ўз навабатида вилоят маъмурияти раҳбари Олег Синегубовнинг таъкидлашича, Изюм туманидаги жанглар давом этмоқда. «Руслар йўналишни кучайтиришга уринаётган бўлсада, Украина армияси барча ҳужумларни қайтармоқда, Изюм шаҳри яқинида Украина Қуролли кучлари Россиянинг яна иккита самолётини уриб туширди», — дейди у.
Изюм—Харьков вилоятидаги катталиги бўйича учинчи шаҳар. 2020 йил маълумотларига кўра, у ерда 46 минг аҳоли истиқомат қилади. Уруш даврида Изюм оғир ярадорлар олиб келинаётган шаҳарлардан бирига айланди.
15 март куни Россия кучлари Украинанинг Херсон вилоятини тўлиқ назоратга олган эди. БМТ маълумотларига кўра, Украинадаги урушда ҳалок бўлган тинч аҳоли вакилларининг сони 925 нафарга етган.
Россия—Украина урушига оид тезкор, ишончли янгиликлар ва маълумотларни «Дарё»нинг Live саҳифаси орқали кузатиб боринг → @Daryo_Live
Изоҳ (0)