Стивен Кинг Россияда ўз китобларини чоп этмасликка қарор қилди. У мамлакатда асарлари энг кўп нашр қилинадиган ёзувчи

Америкалик ёзувчи Стивен Кинг Россияда барча янги шартномалар юзасидан ҳамкорлик тўхтатилганини расман эълон қилди. Бу ҳақда Кингнинг асарларини Россияда чоп этувчи «АCТ» нашриёти маълум қилди, корхонага ёзувчининг агенти ахборот берган.

«АCТ» вакили Кингнинг рус тилида чоп этилган энг янги китоби «Billi Sammers» романи бўлишини билдирган. Россия китоб дўконларида ушбу китоб 6 апрелдан сотувга чиқади, романнинг рақамли релизи эса 15 апрелда ўтказилиши режалаштирилган.

«Аввал сотиб олинган асарларни нашр этиш ҳуқуқи шартномаларда белгиланган муддатларда (яқин уч-тўрт йил давомида) «АCТ»да қолади, аммо янги романлар ва муддати якунига етган ҳуқуқларни узайтириш ишларини маълум вақт давомида амалга ошириб бўлмайди», — деган нашриёт вакили.

5 март куни Стивен Кинг Twitter’да Россия билан китоблар чиқариш масаласидаги шартномаларини узайтирмоқчи эмаслигини эълон қилганди.

Стивен Кинг бугунги кунда Россияда китоблар энг кўп нашр қилинадиган ёзувчи ҳисобланади. «Ведомости»нинг қайд этишича Кинг охирги уч йил ичида китоблари Россияда энг кўп нашр қилинадиган муаллифлар орасида етакчилик қилиб келмоқда, рўйхат Россия китоб палатаси томонидан тузиб чиқилади.

2016 йилдан буён Россияда Стивен Кингнинг 6,7 миллиондан зиёд нусхадаги китоби сотилган. Муаллифнинг Россияда энг кўп сотилган китоб «У» («Оно») ҳисобланади, россияликлар олти йил ичида ушбу китобнинг 393 минг нусхасини харид қилган.

Аввал бир қатор хорижлик ижрочилар ва мусиқа гуруҳлари Россиядаги концертларини бекор қилган, Бёрк, Игги Поп, Twenty One Pilots, The Killers шулар жумласидан.