Жанубий Кореянинг собиқ президенти Пак Кин Хе хоним қамоқдан чиққанидан кейин 3 ойлик даволаниш курсини ўтаб, шифохонани тарк этди, деб ёзмоқда Reuters.
70 ёшли Пак Кин Хе мамлакатнинг демократик йўл билан сайланган биринчи раҳбари бўлганди. 2017 йилда Samsung ва Lotte раҳбарларига ҳам таъсир кўрсатган можаро туфайли Пакга нисбатан Конституциявий суд томонидан импичмент эълон қилиниб, у лавозимидан четлаштирилган.
Жанубий Кореянинг биринчи аёл президенти коррупцияда айбланиб судланганидан кейин деярли беш йил қамоқда ўтирди.
«Президент сифатида мен ватан ва халқ учун астойдил ишлашга ҳаракат қилдим, лекин амалга ошмаган мақсад ва орзуларим ҳам кўп. Бу вазифалар энди бошқаларнинг зиммасида. Мен иқтидорли инсонлар она шаҳрим Тегу ва мамлакатим тараққиётига ҳисса қўшишини қўллаб-қувватлайман» , — деди Пак юзлаб тарафдорларига ва сиёсий курашга қайтиш нияти йўқлигини таъкидлади.
Эслатиб ўтамиз, Пакнинг расман озод этилишига Жанубий Кореяда консерватив номзод Юн Сук Ёл ғалаба қозонган президентлик сайловларидан бир неча кун ўтиб эришилди.
Декабрь ойида Жанубий Кореянинг ўша пайтдаги президенти Мун Чже Ин Пакнинг соғлиғи ёмонлашгани сабаб уни афв этган. Айбловлар бўйича унга 22 йиллик қамоқ жазоси белгиланганди.
Изоҳ (0)