Зеленский Россия билан диалог «қадам-бақадам» олдинга силжиётганини маълум қилди

Россия ва Украина ўртасидаги вазиятни тартибга солиш бўйича музокаралар босқичма-босқич турли даражаларда давом этмоқда. Бу ҳақда Украина президенти Владимир Зеленский ўз мурожаатида маълум қилди.

«Украина вакиллари деярли ҳар куни давом этаётган музокараларда иштирок этмоқда. Бу жуда мураккаб, баъзида жанжалли вазият. Бироқ қадам-бақадам олдинга ҳаракатланяпмиз», — дейди Зеленский.

Россия ва Украина вакиллари 28 февраль, 3 ва 7 март кунлари Беларусда юзма-юз учрашди, шундан сўнг, улар музокараларни видеоформатда давом эттирмоқда. Москва Киевдан Қримни Россия ҳудуди сифатида, Луганск ва Донецк халқ республикалари суверенитетини тан олишни ҳамда ҳеч қандай блокка қўшилмаслик борасидаги нейрал мақомини юридик жиҳатдан мустаҳкамлашни талаб қилмоқда.

Украина талаблари орасида хавфсизлик кафолатлари ва рус қўшинларини мамлакатдан олиб чиқиб кетиш бор. Зеленский Москва билан Қрим, ЛХР ва ДХР масаласида ечим топишга тайёрлигини билдирган. «Буни муҳокама қилишимиз ва у ерда одамлар қандай яшаши бўйича муросага келишимиз мумкин», — деган эди у. Зеленский Россия билан эришилган келишув «тарихий» бўлиши, уларни мамлакат аҳолиси референдумда маъқуллаши кераклигини айтган.

Олдинроқ музокаралар бўйича Россия томони делегацияси раҳбари Владимир Мединский Киев ва Москва музокараларнинг асосий банди — Украинанинг нейтрал мақоми ва НАТОга қўшилмаслик масаласи бўйича «максимал даражада позициясини яқинлаштириш»га муваффақ бўлганини маълум қилганди. Шундан сўнг, у Украина хавфсизлик кафолатлари билан боғлиқ «нюанслар бошланаётганини» таъкидлаган.

Шу билан бирга, Мединский келишув матнини икки давлат раҳбарлари тасдиқлашидан олдин Россия президенти Владимир Путиннинг Зеленский билан учрашувини муҳокама қилишдан бош тортган. Унинг айтишича, ҳужжат матни аввал тайёрланиши ва музокара томонлари билан келишилиши керак. Шундан кейин ТИВ раҳбалари уни имзолаши ва аҳдлашувчи давлат ҳукуматлари томонидан тасдиқланиши лозим.