Zelenskiy Rossiya bilan dialog “qadam-baqadam” oldinga siljiyotganini ma’lum qildi

Rossiya va Ukraina o‘rtasidagi vaziyatni tartibga solish bo‘yicha muzokaralar bosqichma-bosqich turli darajalarda davom etmoqda. Bu haqda Ukraina prezidenti Vladimir Zelenskiy o‘z murojaatida ma’lum qildi.

“Ukraina vakillari deyarli har kuni davom etayotgan muzokaralarda ishtirok etmoqda. Bu juda murakkab, ba’zida janjalli vaziyat. Biroq qadam-baqadam oldinga harakatlanyapmiz”, — deydi Zelenskiy.

Rossiya va Ukraina vakillari 28-fevral, 3 va 7-mart kunlari Belarusda yuzma-yuz uchrashdi, shundan so‘ng, ular muzokaralarni videoformatda davom ettirmoqda. Moskva Kiyevdan Qrimni Rossiya hududi sifatida, Lugansk va Donetsk xalq respublikalari suverenitetini tan olishni hamda hech qanday blokka qo‘shilmaslik borasidagi neyral maqomini yuridik jihatdan mustahkamlashni talab qilmoqda.

Ukraina talablari orasida xavfsizlik kafolatlari va rus qo‘shinlarini mamlakatdan olib chiqib ketish bor. Zelenskiy Moskva bilan Qrim, LXR va DXR masalasida yechim topishga tayyorligini bildirgan. “Buni muhokama qilishimiz va u yerda odamlar qanday yashashi bo‘yicha murosaga kelishimiz mumkin”, — degan edi u. Zelenskiy Rossiya bilan erishilgan kelishuv “tarixiy” bo‘lishi, ularni mamlakat aholisi referendumda ma’qullashi kerakligini aytgan.

Oldinroq muzokaralar bo‘yicha Rossiya tomoni delegatsiyasi rahbari Vladimir Medinskiy Kiyev va Moskva muzokaralarning asosiy bandi — Ukrainaning neytral maqomi va NATOga qo‘shilmaslik masalasi bo‘yicha “maksimal darajada pozitsiyasini yaqinlashtirish”ga muvaffaq bo‘lganini ma’lum qilgandi. Shundan so‘ng, u Ukraina xavfsizlik kafolatlari bilan bog‘liq “nyuanslar boshlanayotganini” ta’kidlagan.

Shu bilan birga, Medinskiy kelishuv matnini ikki davlat rahbarlari tasdiqlashidan oldin Rossiya prezidenti Vladimir Putinning Zelenskiy bilan uchrashuvini muhokama qilishdan bosh tortgan. Uning aytishicha, hujjat matni avval tayyorlanishi va muzokara tomonlari bilan kelishilishi kerak. Shundan keyin TIV rahbalari uni imzolashi va ahdlashuvchi davlat hukumatlari tomonidan tasdiqlanishi lozim.