АҚШ президенти Жо Байден 23 март, чоршанба куни Европага жўнаб кетади, у ерда НАТО ва G7 етакчиларининг саммитида иштирок этади ҳамда Европа Иттифоқи етакчилари олдида нутқ сўзлайди. Байденнинг сафаридан бош мақсад Ғарбнинг Украинадаги вазиятга кейинги муносабатини мувофиқлаштиришдир.
«Президент Байден биз иттифоқчилар ва ҳамкорлар билан ўрнатган беқиёс бирликка таяниб, кейинги қадамлар бўйича маслаҳатлашиш учун Европага боради», — деди АҚШ президентининг миллий хавфсизлик бўйича маслаҳатчиси Жейк Салливан Оқ уйдаги брифингда.
Байден аввалига Брюсселга ташриф буюради, у ерда 24 март куни НАТО етакчиларининг саммити, 24—25 март кунлари Европа кенгаши йиғилиши бўлиб ўтади, унда Байден нутқ сўзлаши кутилмоқда. Шунингдек, 24 март куни G7 етакчиларининг учрашуви бўлиб ўтади.
«У НАТО етакчиларининг фавқулодда саммитида иштирок этади, ‘Катта еттилик’ етакчилари йиғилишида қатнашади ва Европа Кенгаши йиғилишида Европа Иттифоқига аъзо 27 давлат етакчилари олдида чиқиш қилади», — деди Салливан.
Хусусан, ушбу тадбирларда Украинага ҳарбий ёрдам кўрсатиш, Россияга эса санкциялар ёрдамида ҳам янги чоралар ишлаб чиқиш, ҳам мавжуд чораларни кучайтириш орқали босим ўтказиш каби мавзулар муҳокама қилинади.
«У Европанинг энергия хавфсизлигини мустаҳкамлаш ва Россия газига қарамлигини камайтириш бўйича қўшма ҳаракатларни эълон қилади», — дея қўшимча қилди Салливан.
Бундан ташқари, Салливаннинг сўзларига кўра, Байден ҳамкорлар билан биргаликда Россияга қарши янги санкцияларни эълон қилишни режалаштирмоқда. У АҚШ бу ишни шерикларидан айнан қайси бири билан амалга оширишига аниқлик киритмади.
Брюсселдан кейин Байден Польшага боради ва у ерда АҚШ ҳарбий хизматчилари, шунингдек, гуманитар экспертлар ҳамда мамлакат президенти Анжей Дуда билан ҳам учрашади.
Изоҳ (0)